ރުވަންޑާގައި ހިނގަމުން ދިޔަ ގަތުލުއާންމަށް ފަރަންސޭސި ސިފައިން ވާގިވެރިވިކަމަށް ފަރަންސޭސި ރައީސް މެކްރޮން އެއްބަސްވެ ވަޑައިގެންފިއެވެ. 1994 ގައި ހޫޓީންނާއި ޓުޓްސީ ގަބީލާ މީހުންގެ މެދުގައި، ފެށުނު ގަތުލުއާންމުގައި ފަރަންސޭސި ސިފައިންގެ ދައުރެއް އޮތް ކަމަށް ވިދާޅުވެ މެކްރޮން ވަނީ މައާފަށް އެދި ވަޑައިގެންފައެވެ. އޭނާ މިހާރު ހުންނެވީ ރުވަންޑާގެ ވެރިރަށް ކިގާލީގައެވެ.
ރުވަންޑާގެ ގެނޮސައިޑް މެމޯރިއަލްގައި ވާހަކަ ދައްކަވަމުން މެކްރޮން ވިދާޅުވީ، "ހަގީގަތް ބެލުމަށްވުރެން ވުރެން ފަރަންސޭސި ސިފައިން އިޚުތިޔާރު ކުރީ ހިމޭންކަން" ކަމަށެވެ. ނަމަވެސް ގަތުލު އާންމުގައި ފަރަންސޭސިން ބައިވެރިވިކަމަށް އޭނާ އެއްބަސްވެ ވަޑައެއް ނުގަންނަވައެވެ.
ރުވަންޑާގެ ރައީސް ޕައުލް ކަގާމީ ވިދާޅުވީ މެކްރޮންގެ ބަސްފުޅުތައް "މައާފްގެ ބަސްފުޅުތަކަށް ވުރެން މާބާރުގަދަ" ކަމަށެވެ. އަދި މިއީ "ހިތްވަރުގަދަ އަމަލެއް" ކަމަށް އޭނާ ސިފަ ކުރެއްވިއެވެ.
ރުވަންޑާގެ ގަތުލުއާންމުގައި ފަރަންސޭސި ސިފައިންގެ ދައުރާ ބެހޭ ގޮތުން އެގައުމުން އެކުލަވާލި ކޮމިޝަނުން އެކުލަވާލި ރިޕޯޓްގައި ބުނެފައި ވަނީ ފްރާންސްވާ މީޓަރާނގެ ސަރުކާރުން މި ޖަރީމާއަށް ބޮޑު ކޮށް ޒިންމާވާން ޖެހޭނެ ކަމަށެވެ.
1994ގައި ރުވަންޑާގައި ހިންގާފައިވާ ގަތުލުއާންމުގައި އަށް ލައްކަ ޓުޓްސީންނާއި ހޫޓޫން މަރާލާފައި ވެއެވެ.
މި ފޮޓޯގައިވެސް މި ފެންނަނީ ހޫޓޫ ހަނގުރާމަވެރިންގެ ބައިގަނޑެއް ފަރަންސޭސި ޕެޓްރޯލަކާ އެއްކޮށްދާ މަންޒަރެވެ.
ފަރަންސޭސިވިލާތުން ރުވާންޑާގައި ހިންގި އޮޕަރޭޝަންއާ ބެހޭ ހުރިހައި މައުލޫމާތަކާއި ޑޮކިއުމެންޓެއް ވަނީ ކޯޓު އަމުރަކަށް ސިއްރު ކުރެވިފައެވެ. ރިސާޗް ކުރާ މީހުންގެ އެދުމަށްވެސް މިފައިލްތައް ހުޅުވުމަށް ކޯޓުން ހުއްދަ ދީފައެއް ނުވެއެވެ.
1994ގެ ގަތުލު އާންމަކީ، ރުވަންޑާގެ ރައީސް ޖުވެނިއަލް ހަބިއަރްމާނާ، ސުލްޙައިގެ މަޝްވަރާތައް އަވަށްޓެރި ބުރުންޑީގައި ބޭއްވުމަށްފަހު ވަޑައިގަންނަވަނި ކޮށް ކިގާލީ އެއަރޕޯޓް މަތިން އޭނާގެ ބޯޓް ވައްޓާލުމަށްފަހު ގައުމުގައި ފެތުރިގެން ދިޔަ ގަތުލު އާންމެކެވެ. މި ގަތުލު އާންމު ފެށުމާއެކު ބައިނަލްއަގްވާމީ ލަޝްކަރެއް ފޮނުވުމަށް އެދުމުން ސަލާމަތީ މަޖިލީހުން އެކަން ކުރީ ލަސްކޮށެވެ. އަދި ސުލްހަ ބަލަހައްޓަން ދިޔަ ފަރަންސޭސި ސިފައިންވެސް ދިޔައީ ގަތުލުއާންމަށް ފުރުސަތު ދެމުންނެވެ.
ރުވަންޑާގެ މިހާރުގެ ރައީސް ޕައުލް ކަގާމީއަކީވެސް އެއިރު ސަރުކާރާ ދެކޮޅަށް ހަނގުރާމަ ކުރި މީހެކެވެ. ނަމަވެސް އޭނާ ވަނީ ތހުމަތުތަކުން ސަލާމަތް ވެފައެވެ.
ރުވަންޑާގެ ގަތުލުއާންމުގައި އެންމެ ފާހަގަ ކުރެވޭ ހާސިދާއަކީ ހޮޓެލް ރުވަންޑާގައި މީހުންނަށް ހިމާޔަތް ދިން ހިތްވަރުގަދަ އަމަލެވެ. "ހޮޓެލް ރުވަންޑާ" ފިލްމުގައި މިކަން ގެނެސްދީގައި ވެއެވެ. ރުވަންޑާގެ ރައީސްއާ ދެކޮޅަށް ފާޑު ކިޔުމުން އެމެރިކާއިން ފްރީޑޮމް މެޑަލް ދީފައިވާ މިމީހާ ރުވަންޑާގައި ހައްޔަރުކޮށް މިހާރު ވަނީ ޝަރީއަތަށް ހުށަހެޅިފައެވެ. ޕައުލް ކަގާމީއާ ދެކޮޅުވެރިންގެ ޝަރީއަތް ކުރެވެނީ ގަތުލުއާންމުގައި ބައިވެރިވި ކަމުގެ ތުހުމަތުގައެވެ.
އަލްޖަޒާއިރުގައި ފަރަންސޭސި ހިންގި ގަތުލުއާންމަށް އަދި މައާފަށް އެދިފައެއް ނުވެއެވެ. އަދި އަލްޖަޒާއިރުގެ ދަނގަނޑު ވަގަށް ނަގައިގެން އައިފެްލ ޓަވަރ ހެދިކަމަށް ބަދަލު ދިނުމަށްވެސް އަދި އެއްބަސްވެފައެއް ނުވެއެވެ.
