އެމެރިކާގެ ޔުނިވަރސިޓީތަކަށް ޗައިނާއިން ދޭ ކޮންޓްރެކްޓްތަކާއި އެހީތަކާ ބެހޭ ގޮތުން ގައުމީ ސަލާމަތީ ފެންވަރުގައި ބަލަން ޖެހޭކަންކަން ބެލުމަށް ގޮވާލާ ގާނޫނެއް ކޮންގްރެސްއަށް ހުށަހަޅައިފިއެވެ. މިއީ ޗައިނާއާ ވާދަވެރިކަން ރަނގަޅު ކުރުމަށް ކުރަމުން އެމެރިކާއިން ގާނޫނީ އޮނިގަނޑުގެ ތެރޭން ކުރަމުން ގެންދާ މަސައްކަތުން ބައެކެވެ.
މި ގާނޫނު ފާސްވުމާއެކު، އެމެރިކާގައި ބޭރު ގައުމުތަކުން ކުރާ އިންވެސްޓްމެންޓްތައް ދިރާސާ ކުރާ ކޮމިޝަނުން، ޗައިނާއިން ދޭ އެއް މިލިއަން ޑޮލަރަށްވުރެން އިތުރުވާ ފަންޑްތައް ދިރާކޮށް ބަލައި ރިޕޯޓް ކުރާނެއެވެ.
ލަފާ ކުރެވޭ ގޮތުގައި މި ގާނޫނު މިހިނގާ ހަފްތާގައި ފާސްވެގެން ދާނެއެވެ. މިބިލް އެކުލަވާލާފައި ވަނީ ސެނެޓްގެ ފޮރިން އެފެއާޒް ކޮމިޓީގެ މެންބަރުންވެގެންނެވެ.
އެމެރިކާގެ މަތީ ތަޢްލީމުގެ ދާއިރާގައި ޗައިނާގެ ނުފޫޒު ގަދަވެފައިވާ މައްސަލައަކީ، އެމެރިކާއިން ނުތަނަވަސްކަން ފާޅުކުރާތާ އެތައް ދުވަސްވެފައިވާ މައްސަލައެކެވެ. އެމެރިކާއިން ދެކޭ ގޮތުގައި ޗައިނާއިން އެމެރިކާގެ ރިސާޗް ދާއިރާއަށް ނުފުޒު ފޯރުވުމުގެ ސަބަބުން ގައުމީ ސަލާމަތަށްވެސް އޭގެ ނުރައްކާތަކެއް ހުރި ކަމަށެވެ.
ޗައިނާއަކީ އެމެރިކާއަށް އެންމެ ގިނައިން ކިޔަވާ ކުދިން ފޮނުވާ ގައުމެވެ. އަދި އެމެރިކާގެ މަތީ ތަޢްލީމު ދޭ އިދާރާތަކަށް އެންމެ ގިނައިން ފައިސާދޭ ގައުމަކީވެސް ޗައިނާއެވެ.
2014 އިން ފެށިގެން މިހާތަނަށް ޗައިނާއިން ބިލިއަނަކަށްވުރެން ގިނަ ޑޮލަރު އެހީގެ ގޮތުގައި އެމެރިކާގެ މަތީތަޢްލީމަށް ހަދިޔާކޮށް ދީފައި ވެއެވެ.
