ޗައިނާއިން ޔޫރަޕްގެ ހަތަރު ގައުމެއްގެ ޚާރިޖީ ވަޒީރުންނަށް ބެއިޖިންގއަށް ވަޑައިގަތުމަށް ދައުވަތު ދީފިއެވެ. ހޮނިހިރު ދުވަހު ބެއިޖިންގއަށް ވަޑައިގަންނަވާ ޚާރިޖީ ވަޒީރުންނަކީ، އަޔަރަލެންޑާއި ޕޮލެންޑާއި ހަންގެރީއާއި ސަރބިއާގެ ޚާރިޖީ ވަޒީރުންނެވެ.
ޗައިނާގެ ޚާރިޖީ ވަޒީރު މި ބޭފުޅުންނަށް ދައުވަތު ދެއްވީ، ޔޫރަޕާއި ޗައިނާގެ މިނިވަން ވިޔަފާރީގެ އެއްބަސްވުމާ ދެކޮޅަށް ޔޫރަޕްގެ ޕާލަމެންޓްގައި އަޑު އުފުލުމުގެ ސަބަބުން ޔޫރަޕްގެ އިއްތިހާދުން އެ އެއްބަސްވުން ކުރިއަށް ނުގެންދިއުމަށް ނިންމުމުންނެވެ.
ޗައިނާއިން ވަނީ ޝިންޖިއާން މައްސަލާގައި ޗައިނާއާ ދެކޮޅަށް ވާހަކަ ދެއްކި ޔޫރަޕްގެ މަސްއޫލުވެރިންނާއި އީޔޫ ޕާލަމެންޓްގެ ބައެއް މެންބަރުންނާ ދެކޮޅަށް ދަތިކުރުމުގެ ފިޔަވަޅު އަޅާފައެވެ. މި ކަމަށް ޔޫރަޕްގެ ޕާލަމެންޓުން ވަނީ ޗައިނާއަށް ފާޑު ކިޔާފައެވެ.
ޗައިނާއަކީ ހަންގެރީގެ ކަނާތު ފިޔައިގެ ހަރުކަށި ސަރުކާރާއެކު ގާތް ގުޅުމެއް ބާއްވާ ގައުމެކެވެ. ޗައިނާގެ ޔުނިވަރސިޓީއެއްގެ ގޮތްޕެއް ބުޑަޕެސްޓްގައި ހެދުމަށް ނިންމުން ރައްޔިތުން ވަނީ އެކަމާ ދެކޮޅަށް އަޑު އުފުލާފައެވެ.
ހަންގެރީއަކީ ޕޮލެންޑެކޭ އެއްފަދައިން ސަރުކާރުން އިސްލާމޯފޯބިއާއަށް ހިތްވަރުދޭ ގައުމެކެވެ.
ސަރބިއާ އަކީ ޔޫރަޕްގައި ޗައިނާގެ ބޮޑު ރަހުމަތްތެރިއެކެވެ. ޗައިނާ ވެކްސިން އެންމެ ބޮޑަށް ބޭނުން ކުރި ޔޫރަޕްގެ ގައުމަކީވެސް ސަރބިއާއެވެ. ސަރބިއާގައި ބޮޑެތި ޕްރޮޖެކްޓްތައް ދީފައިވަނީ ޗައިނާ އަށެވެ. އަދި ޗައިނާގެ ވެކްސިން ޔޫރަޕްގައި އުފައްދާ ހަމައެކަނި ގައުމަކީވެސް ސަރބިއާއެވެ.
ޔޫރަޕްގެ އިއްތިހާދުގެ މެމްބަރަކަށް ނުވިއަސް ސަރބިއާއަކީ، ޗައިނާއާ ޔޫރަޕްގެ މަޝްވަރާތަކަށް ޗައިނާއިން އެކުލަވާލާފައިވާ 17+1 ޖަމާއަތުގެ މެމްބަރެކެވެ. މި ގްރޫޕުން ވަކިގެންފައިވާ ގައުމަކީ ލިތުއޭނިއާ އެވެ. މެއި މަހު ލިތުއޭނިއާގެ ޕާލަމެންޓުން ވަނީ ޝިންޖިއާން ގައި ޗައިނާއިން ހިންގާ އަމަލުތަކަކީ ގަތުލުއާންމު ކަމަށް ބުނެ، މި ޖަމާއަތުން ވަކިވެގެންފައެވެ.
ތިން ދުވަސް ވަންދެން މިހަތަރު ގައުމުގެ ޚާރިޖީ ވަޒިރުން ބެއިޖިންގ ގައި ތިއްބަވާއިރު ޗައިނާގެ ޚަރިޖީ ވަޒީރު މި ބޭފުޅުންނާއެކު ވަކިވަކިން މަޝްވަރާތައް ބާއްވަވާނެއެވެ.
ޗައިނާއިން ދައުވަތުދީފައިވާ އެއްވެސް ގައުމެއްގެ ޕާލަމެންޓުން ޝިންޖިއާންގައި ޗައިނާއިން ހިންގާ އަމަލުތައް ކުށްވެރިކޮށްފައެއް ނުވެއެވެ.
