ޔޫރަޕްގެ ޖަމާއަތުން ވަކި ވުމަށްފަހު އަސްކަރީ ބާރު ދައްކާ ލުމަށް އިނގިރޭސިވިލާތުން ވަނީ ދުނިޔޭގެ ކަންކޮޅުތަކަށް އަސްކަރީ ފުޅަނދެއް ފޮނުވަން ތައްޔާރުކޮށްފައެވެ. އިނގިރޭސި މަނަވަރުތައް ފޮނުވާލުމާ ގުޅޭގޮތުން ބޭއްވި ރަސްމިއްޔާތުގައި ވާހަކަ ދައްކަވަމުން އިނގިރޭސި ބޮޑު ވަޒިރު ބޮރިން ޖޯންސަން ވިދާޅުވީ އޭނާގެ ގައުމުގެ އަސްކަރީ އުޅަނދުތަކުން ޗައިނާގެ އުދުވާނާ ކުރިމަތިލާނެ ކަމަށެވެ.
ގިނަ އަދަދަކަށް ޗައިނާއިން މުދާ އެތެރެކުރުމަށް ބަރޯސާ ކުރާ އިނގިރޭސިވިލާތުގެ ބޮޑު ވަޒީރު ވަނީ ޖަޕާނުގެ ބޮޑު ވަޒީރާއެކު ފޯނުން ދެއްކެވި ވާހަކަތަކުގައިވެސް މިފަދައިން ވިދާޅުވެފައެވެ.
އިނގިރޭސިވިލާތުން ވަނީ ހަތް މަހުގެ ދަތުރަކަށް އިނގިރޭސި އެތައް މަނަވަރެއް 3700 މީހުންނާއެކު ދުނިޔޭގެ އެކި ތަންތަނުން ބުރުޖެހުމަށް ފޮނުވަން ނިންމާފައެވެ.
އިނގިރޭސިވިލާތުން ގެންގުޅޭ މަތިންދާ ބޯޓް އުފުލާ ދެ މަނަވަރުން އެއް މަނަވަރާއި 32 މަތިންދާ ބޯޓް މިދަތުރުގައި ބައިވެރިވާނެއެވެ. މި ފުޅަނދުތަކުގައި މަތިންދާ ބޯތް އުފުލާ ކުއީން އެލިޒަބަތު މަނަވަރާއި، ސެބްމެރީނަކާއި އިތުރު އަށް މަނަވަރު ބައިވެރިވާނެއެވެ. މިއީ ފަންސާހަކަށް އަހަރު ތެރޭގައި އިނގިރޭސިވިލާތުން ބޭރުވާ މިވަރުގެ ބޮޑު ކަނޑުގެ ލަޝްކަރެވެ.
ވިލާތު އިއްތިހާދުން ބޭރުވުމަށްފަހު އިނގިރޭސިންގެ އިގްތިސާދު ރަނގަޅުކޮށް، އިނގިރޭސިވިލާތަށް ބައިނަލްއަގްވާމީ މަސްރަހުގައި އިތުރު ކާމިޔާބީތަކެއް ހޯދުމަށްޓަކައި އިނގިރޭސިވިލާތުން ދަނީ އައު ބައިވެރިން ހޯދުމަށް މަސައްކަތް ކުރަމުންނެވެ.
