ސައޫދީ އަރަބިއްޔާއިން އިންޑިއާއަށް 60 ޓަނުގެ ލިކުއިޑް މެޑިކަލް އޮކްސިޖަން ފޮނުވައިފިއެވެ. މުމްބާއީއަށް މި އޮކްސިޖަން އައިސްފައި ވަނީ ތިން ކޮންޓެއިނާގައެވެ. އަދި ކުރިއަށް އޮތް މަސް ދުވަސް ތެރޭގައި އިރތުރު 100 ކޮންޓެއިނަރ އަންނާނެކަމަށް ލަފާ ކުރެވެއެވެ.
ސައޫދީ އަރަބިއްޔާއަށް ޝުކުރު އަދާކުރަމުން އިންޑިއާގެ ޕެޓްރޯލިއަމް މިނިސްޓަރ ދަރްމެންދްރާ ޕްރަދާން ވިދާޅުވީ، މިއިން ސައްކައި ދެނީ ސައޫދީ އަރަބިއްޔާގެ ވެރިންނާއި އިންޑިއާގެ ބޮޑު ވަޒިރު ނަރެންދްރަ މޮދީއާ ދެމެދު އޮތް ބަދަހި ގުޅުން ކަމަށެވެ.
ޕްރަދާން ވަނީ ކޮވިޑްއާ ގުޅިގެން އިންޑިއާއަށް ސައޫދީ ސަރުކާރުން ވެދެއްވާފައިވާ އެހެން އެހީތަކަށްވެސް ޝުކުރު އަދާ ކުރައްވާފައެވެ.
އިންޑިއާގެ ކޮވިޑްގެ ހާލަތު ބައެއް ސަރަހައްދުތަކުގައި ދަނީ ރަނގަޅު ވަމުންނެވެ. އިންޑިއާގެ 1.3 ބިލިއަން މީހުންގެ އާބާދީގައި ވެކްސިން ލިބިފައި ވަނީ ތިން ޕަސެންޓް މީހުންނަށެވެ. މިއީ އެންމެ ގިނައިން ބަލި ޖެހިފައިވާ މީހުންތިބި ގައުމުތަކުގައި ވެކްސިން ލިބިގަނެފައިވާ މީހުންގެ ތެރޭން އެންމެ އަދަދު މަދު ގައުމެވެ.
އެޕްރީލް މަހުވެސް ސައޫދީ އަރަބިއްޔާއިން ވަނީ އިންޑިއާއަށް 80 ޓަނުގެ ލިކުއިޑް އޮކްސިޖަން ފޮނުވާފައެވެ.
