އަފްޣާނިސްތާންގެ ގައުމީ ސަލާމަތާ ބެހޭ މުޝީރާއި ޕާކިސްތާނުން އެއް ގޮތަކަށްވެސް މުއާމަލާތު ނުކުރުމަށް އިސްލާމްއާބާދުން ނިންމައިފިއެވެ. އަފްޣާނިސްތާންގެ ގައުމީ ސަލާމަތާ ބެހޭ މުޝީރު ޙަމްދުﷲ މުޙިއްބު ވަނީ އާންމުންގެ ތެރޭގައި އޭނާ ދެއްވި ތަގްރީރެއްގައި ޕާކިސްތާންގެ ދާޚިލީ ކަންތައްތަކާ ބެހި ވަޑައިގެން ފައެވެ. އަދި ޕާކިސްތާނަށް ނިސްބަތް ކޮށް ހުތުރު ބަހުން ވާހަކަ ދައްކަވާފައެވެ.
ވޮއިސް އޮފް އެމެރިކާ އުރުދޫ ސާވިސްއާ ވާހަކަ ދެއްކެވި ޕާކިސްތާންގެ އިސް މަސްއޫލު ވެރިއަކު ވިދާޅުވީ މުޙިއްބު އެމަގާމުގައި ހުންނެވިހާ ދުވަހަކު ޕާކިސްތާން ސަރުކާރުން އޭނާއާ މުއާމަލާތެއް ނުކުރާނެ ކަމަށެވެ.
އިސްލާމްއާބާދުން ވަނީ ހަރުކަށި އިބާރާތުން އަފްޣާން ސަރުކާރަށް އިސްލާމްއާބާދުގެ ނުރުހުން ރައްދު ކޮށްފައެވެ.
އަފްޣާނިސްތާންގެ ނަންގަހާރު ޕްރޮވިންސްގައި މިމަހުގެ ކުރީކޮޅު ދެއްވި ތަގްރީރެއްގައި މުހިއްބު ވިދާޅުވީ، "ޕާކިސްތާނަކީ ނާސި ގެއެއް" ކަމަށެވެ.
އޭނާ އިތުރަށް ވިދާޅުވީ، ޕާކިސްތާންގެ ޕަޝްތޫ ގާބީލާތަކާއި ބަލޯޗީ ގަބީލާތަކުން ޕާކިސްތާން ސަރުކާރާ މެދު ހިތްހަމަ ނުޖެހިގެން އެމީހުން އެމީހުންގެ ހައްގު ހޯދުމަށް މަސައްކަތް ކުރަމުންދާ ކަމަށެވެ.
މުހިއްބުގެ މި ނޭދެވޭ ބަސްމަގު އައިސްފައި ވަނީ ޕާކިސްތާންގެ އިސް ޖެނެރަލް ގަމަރު ޖާވިދު ބާޖްވާ ކާބުލްއަށް ވަޑައިގެން ރައީސް އަޝްރަފް ޣަނީއާ ބައްދަލު ކުރެއްވިތަނާ މާގިނަ ދުވަހެއް ނުވަނީހެވެ.
އަފްޣާނިސްތާނުން މިކަމަށް ރައްދު ދީފައެއް ނުވެއެވެ. އަފްޣާނިސްތާން ޕްރެސް އެޖެންސީ ޚާމާއިން ބުނިގޮތުގައި މިކަމާމެދު ނުރުހުން ފާޅުކޮށް ޕާކިސްތާން ފޮރިން މިނިސްޓްރީން ބަޔާނެއްވެސް ނެރެފައި ވެއެވެ.
