ޕާކިސްތާންގައި ލިޔަންދަތުމުގެ މިންވަރާ މެދު ނުތަނަވަސްވާފަދަ މަޢްލޫމާތު ތަފާސްހިސާބުން ދައްކައެވެ. ޚާއްސަ ގޮތެއްގައި ޕާކިސްތާންގެ ސިންދު ސަރަހައްދު ލިޔަންކިޔަން ދަތުމުގައި ފަހަތުގައި އުޅޭ ކަމަށް ދައްކައެވެ.
ތަފާސްހިސާބުން ދައްކާ ގޮތުގައި އުމުރުން 10 އަހަރުން ދަށުގެ ކުދިންގެ ތެރޭން ލިޔަންކިޔަން ދަތުމުގެ ނިސްބަތް އުޅެނީ 60 އިންސައްތައިގައެވެ. އަދި މިއަދަދު އަހަރުތަކަށް ފަހު މަތިވެގެން ގޮސްފައި ނުވާ ކަމަށް ދައްކައެވެ. ސިންދު ޕްރޮވިންސްގައި 10 އަހަރުން ދަށުގެ ކުދިންގެ ލިޔަންކިޔަން ދަތުން ދަށަށް ގޮސްފައިވާ ކަމަށް ދައްކައެވެ.
ޕާކިސްތާން ޓްރިބިއުން ނޫހުން ބުނިގޮތުގައި ލިޔަންކިޔަން ދަތުމުގެ ނިސްބަތުން ޕާކިސްތާން އުޅެނީ ދުނިޔޭގެ އެންމެ ފަހަތުގައެވެ. ޕާކިސްތާނަށް ވުރެން ދަށްކަމަށް ކިޔަންކިޔަން ދަތުމުގައި ދައްކާ ގައުމުތަކަކީ އަހުލާ ހަނގުރާމައެއް ދާދިފަހުން ނިންމައި ސަލާމަތްވެފައިވާ ގައުމުތަކެވެ. މިހާރުވެސް އަހުލީ ހަނގުރާމައިގައި ހަނާވަމުންދާ ޔަމަނާ ސޫރިޔާއާ ޕާކސްތާން ލިޔަންކިޔަން ދަތުމުގައި އެއްވަރުކަމަށް އެ ނޫހުން ބުންޏެވެ.
ޕާކިސްތާންގައި ކުދިން އެންމެ ގިނައިން ސްކޫލަށްދާ ޕްރޮވިންސަކީ، ޕަންޖާބް ޕްރޮވިންސެވެ. ޖެހިގެން ދެން އެންމެ ގިނައިން ކުދިން ސްކޫލަށް ދަނީ ޚައިބަރު ޕަޚްތޫންޚުވާ ޕްރޮވިންސްގައެވެ.
މިހާރު، ޕާކިސްތާންގެ އުމުރުން 5 އަހަރާ 16 އަހަރާ ދެމެދުގެ ފުރައިގެ ކުދިންގެ ތިން ބައިކުޅަ އެއްބަޔަކީ ސްކޫލަށް ދާ ބަޔެއް ނޫނެވެ. ބަލޯޗިސްތާނަކީ މިކަމުގައި ހައްދުފަހަނައަޅާފައިވާ ޕްރޮވިންސެއްކަމަށް ދައްކައެވެ. ބަލޯޗިސްތާންގައި މިފުރައިގެ 47 އިންސައްތަ ކުދިން ސްކޫލަކަށް ނުދެއެވެ.
ތަފާސްހިސާބު ދައްކާ ގޮތުން ޕަންޖާބްގައި ސްކޫލަށް ދާ ކުދިންގެ އަދަދު ގިނަކަމަށް ދެއްކިއަސް 26 އިންސައްތަ ކުދިންނަކީ ސްކޫލަށްދާ ބަޔެއް ނޫނެވެ.
ޖުމުލަ ކޮށް ތަފާސްހިސާބު ދައްކާގޮތުން ޕާކިސްތާން ގައި ލިޔަންދަތުމުގައި އެންމެ ދަށް ކޮށް އުޅެނީ، އެންމެ ތަރައްގީ ނުވާ އަވަށްތަކެވެ.
ޕާކިސްތާންގެ މުސްތަގްބަލުގެ މަސައްކަތް ތެރިން މިހާރު ލިޔަންކިޔަން ނުދަންނަ ކަމުގައި ވަނީނަމަ، ޕާކިސްތާނުން ހާސިލު ކުރަން މަސައްކަތް ކުރާ ޑިޖިޓަލް ޕާކިސްތާންގެ ހުވަފެން ހަގީގަތަކަށް ހެދުމުގައި ދަތިތަކާ ކުރިމަތިލާން ޖެހޭނެކަމަށް ޓްރިބިއުން ނޫހުގެ އެޑިޓޯރިއަލްގައި ބުނެއެވެ.
