އިންޑިއާއާއި ޕާކިސްތާންގެ ގުޅުމަކީ، އެކުގައި ނުއުޅެވޭ، އެކަމަކު އެއްކޮށް އުޅެން ބޭނުންވާ ދެމަފިރިއެއްފަދަ ގުޅުމެކެވެ. މަޝްވަރާތައްވެސް ބާއްވައެވެ. ގުޅުން ރަނގަޅު ކުރަން ބޭނުންވާ ކަމުގެ އިޝާރާތްވެސް ދެއެވެ. ދެ ލޯބިވެރިން ސިޓީބިޓީ ބަދަލު ކުރާހެން މެސެޖްވެސް ބަދަލު ކުރެއެވެ. ފާޅުގައި މުޅިންވެސް އެހެން ގޮވެއްޔެކެވެ.
އިމްރާން ޚާން މިއަދު ވިދާޅުވީ ކަޝްމީރު މައްސަލަ ހައްލު ނުކުރެވޭ ހިނދު އިންޑިއާއާ ގުޅުން ރަނގަޅު ކުރާކަށް ބޭނުންފުޅެއް ނޫން ކަމަށެވެ. އަދި ގުޅުން ރަނގަޅު ކޮށްފިނަމަ ވާކީ ކަޝްމީރު މީހުންނަށް ވެވޭ ޚިޔާނާތެއް ކަމަށެވެ.
އިމްރާން ޚާން މިވާހަކަ އިއްވެވީ ލައިވްކޮށް ބޮޑު ވަޒީރާ އެކު އޮތް ސުވާލް ޖަވާބް ސެޝަންއެއްގައެވެ. ޚާން ވިދާޅުވީ ޝައްކެތް ނެތް ގޮތުގައި އިންޑިއާއާއި ގުޅުން ރަނގަޅު ވުމުން މުވާސަލާތާއި ވިޔަފާރީގެ ގުޅުން ރަނގަޅުވާނެ ކަމަށެވެ. ޔޫރަޕްގެ ސަރަހައްދުން މިސާލު ޖައްސަވަމުން ޚާން ވިދާޅުވީ އެތަންތަނުންވެސް މިފަދަ ފައިދާތައް ފެންނާން ހުރި ކަމަށެވެ. އެކަމަކުވެސް ގުޅުން ރަނގަޅު ކުރަން ބޭނުން ފުޅެއް ނޫން ކަމަށް ވިދާޅުވިއެވެ.
އިމްރާން ޚާން ބާރުއަޅުއްވަނީ އިންޑިއާއިން ގާނޫނުއަސާސީގެ މާއްދާ 370އަށް ގެނަސްފައިވާ ބަދަލު އަނބުރާލުމަކީ ގުޅުން ރަނގަޅު ކުރުމަށް ޝަރުތެއް ކަމަށެވެ.
