ދުނިޔޭގެ މުއްސަނދި ގައުމުތަކުން އަމިއްލަ ފައިދާއަށް ވެކްސިން ބައްކުރުމަށް ކުރަމުންދާ މަސައްކަތާ ދެކޮޅަށް ދުނިޔޭގެ ކުރީގެ ލީޑަރުންނާއި ރައީސުން ތެދުވެ ވަޑައިގެންފިއެވެ. ޖީ7ގެ ގައުމުތަކުގެ ވެރިންނަށް، ދުނިޔޭގެ 100 އެއްހާ ކުރީގެ ލީޑަރުން ފޮނުއްވި ސިޓީގައި ވިދާޅުވެފައި ވަނީ ދުނިޔޭގެ އެންމެނަށް ވެކްސިން ފަސޭހައިން ލިބި ދިނުމަކީ އެންމެންގެ މަސްލަތަށް އޮތް ހެވެއް ކަމަށެވެ.
މިބޭފުޅުންގެ ސިޓީގައި ވިދާޅުވެފައި ވަނީ ދުނިޔޭގެ ގައުމުތަކުގެ ގުޅުމުން 2020ގައި މުޅި ދުނިޔެ ފެއިލް ކޮށްލާފައިވާ ކަމަށެވެ. އަދި 2021ގައި މިފަދައިން ކަން ހިނގައި ދިޔަ ނުދިނުމަށް މަސައްކަތް ކުރެއްވުމަށް ބާރުއަޅުއްވާފައި ވެއެވެ.
ދުނިޔޭގައި މިހާރު ލިބެން ހުރި ވެކްސިން އަދިވެސް ގައުމުތަކަށް ލިބެމުންދަނީ ވިޔަފާރި އުސޫލުންނެވެ. ފަގީރު ގައުމުތަކާއި މެދުފަންތީގެ ގައުމުތަކުގެ ތެރޭން ވެކްސިން ލޮލުން ނުދެކޭ ގައުމުތައް އަދިވެސް އެބަހުއްޓެވެ.
ދުނިޔޭގެ ކުރީގެ ލީޑަރުން ވިދާޅުވީ މުޅި ދުނިޔެ މި ވަބާއިން ރައްކާތެރި ނުވާހައި ހިނދަކު އެއްވެސް ބަޔަކަށް އަމާންކަމެއް ނެތް ކަމަށެވެ. މި ބޭފުޅުން ހުށަހަޅުއްވާފައި ވަނީ މުޅި ދުނިޔޭގެ އެންމެނަށް ވެކްސިން ލިއްބައި ދިނުމަށް 30 ބިލިއަން ޑޮލަރު ދެ އަހަރަށް ބަހާލައިގެން ކަނޑައަޅައި ދިނުމަށެވެ. އަދި މިއީ ދުނިޔޭގެ އެންމެނަށް އިންޝޫރެންސެއްކަމަށް ބަލައިފިނަމަ ޖީ 7 އާއި ޖީ20ގެ ގައުމުތައް ގުޅުމުން ވެގެންދާނީ ވަރަށް ކުޑަކުދަ އަދެއްކަމަށްވެސް މި ބޭފުޅުން ވިދާޅުވެއެވެ.
މިސިޓީގައި ސޮއިކުރެއްވި ބޭފުޅުންގެ ތެރޭގައި ޔޫރަޕްގެ ގައުމުތަކުގެ ރައީސުންނާއި ބޮޑު ވަޒީރުންނާއި އޭޝިއާ އެފްރިކާގެ ކުރީގެ ވެރިންނާއި ޖަމުއިއްޔާ ޖަމާއަތްތަކުގެ ވެރިކަން ކުރެއްވި ބޭފުޅުން ހިމެނިވަޑައިގަންނަވައެވެ.
އިންޑިއާއާއި ދެކުނު އެފްރިކާއިން ދުނިޔޭގެ ވިޔަފާރި ޖަމުއިއްޔާގައި އެދިފައިވަނީ ފަސޭހައިން ކޮވިޑް ވެކްސިން އުފެއްދޭ ގޮތަށް ފިކުރީ މުދަލުގެ ހައްގު ވަގުތީ ގޮތުން ދޫކޮށްލުމަށް ނިންމައި ދިނުމަށެވެ. ނަމަވެސް ފަހުގެ ޚަބަރުތައް ބުނާ ގޮތުން ވިލާތު އިއްތިހާދުން މަސައްކަތް ކުރަމުން ދަނީ މިކަމާ ދެކޮޅަށެވެ. ވެކްސިން ވިއްކައިގެން ޗައިނާއާއި ޔޫރަޕްގައި މިހާރުވެސް ބަޔަކު ވަނީ ބިލިއަނަރުންނަށް ވެފައެވެ.
