ޕާކިސްތާންގެ ބޮޑު ވަޒިރު އިމްރާން ޚާން އިއްޔެ ބަލޯޗިސްތާނަށް ކުރެއްވި ޒިޔާރަތުގައި ވިދާޅުވީ ބަލޯޗިސްތާނަށް ގިނަ އަދަދަކަށް އިންވެސްޓްކޮށް އިގްތިސާދީ ފުރުސަތުތައް ފަހިކޮށްފައިވާ އިރު، އަދިވެސް ބަލޯޗިސްތާންގައި ޓެރަރިޒަމްގެ އަމަލުތައް ގިނައިން ހިނގަމުން ދަނީ ކީއްވެގެން ހެއްޔެވެ؟
ބަލޯޗިސްތާނަކީ މިހާރު ޕާކިސްތާންގައި ހަރުކަށި ހަމަލާތައް އެންމެ އާންމު ސަރަހައްދެވެ. ޗައިނާއިން އިންވެސްޓް ކޮށްފައިވާ ގަވަދާރް ބަނދަރާއި ޑިއުޓީ ފްރީ އޭރިއާއެކުވެސް މި ސަރަހައްދުގެ މީހުންގެ މެދުގައި ސަރުކާރުގެ ސިޔާސަތާމެދު ދެކެނީ ޝައްކުގެ ނަޒަރަކުންނެވެ. މީހުން ދެކޭ ގޮތުގައި އެމީހުންގެ މުއްސަނދިކަން އެމީހުންނަށް ލިބުމުގެ ބަދަލުގައި ލިބެނީ ސިންދާއި ޕަންޖާބް މީހުންނަށެވެ.
ބަލޯޗިސްތާނަކީ ކުރިންވެސް ތާލިބާންގެ ތާއީދު ބޮޑު ސަރަހައްދެކެވެ. އެމެރިކާ ސިފައިން އަފްޣާނިސްތާނަށް އެރުމުން ތާލިބާން ހަރަކާތްތެރި ވަމުން ދިޔައީ ބަލޯޗިސްތާނުންނެވެ.
އަލުން އެމެރިކާ ސިފައިން އަފްޣާނިސްތާނުން ފައިބައިގެން ދިއުމާއި ޗައިނާގެ އިންވެސްޓްމެންޓްތަކާއެކު ތާލިބާނާއި ހަނގުރާމަވެރިންނަށް ފުރުސަތުތަކެއް ބަލޯޗިސްތާންގައި ފަހވެއެވެ.
ޗައިނާ ޕާކިސްތާން އިކޮނޮމިކް ކޮރިޑޯ (ސީޕެކް) ރައީސް ލެފްޓިނެންޓް ޖެނެރަލް އާސިމް ސަލީމް ބާޖްވާ، ވިދާޅުވެފައި ވަނީ ގަވަދާރްގައި އިގްތިސާދީ ހަރަކާތްތައް ފެށުމުން ޕާކިސްތާނަށް އަހަރަކު ދިހަ ބިލިއަން ޑޮލަރު ވަންނާނެ ކަމަށެވެ.
ބަލޯޗްގެ ގައުމީ ޚިޔާލުގެ މީހުންނާއި ހަރުކަށި އިސްލާމީ ތާލިބާން ފިކުރުގެ މީހުން ބުނަމުން ދަނީ އެމީހުންގެ ދިރިއުޅުމަށް މި ޑޮލަރުގެ އާމްދަނީ ތަރުޖަމާ ވަމުންނުދާ ކަމަށެވެ.
ސީޕީއާއި ޗައިނާއާ ދެކޮޅަށް ތާލިބާނުން ގެންގުޅޭ ހަރުކަށި ރޫހު އެނގިގެން ދަނީ އެޕްރީލް 21ގައި ޗައިނާ އެމްބެސެޑަރާ ދެކޮޅަށް ތާލިބާނުން ކުއެޓާ ހޮޓަލްގެ ބޭރުގައި ދިން ހަމަލައިން ނެނެވެ.
އަފްޣާނިސްތާންގައިވެސް ތާލިބާންގެ ޝިކާރައަކަށް ވަނީ ޝީއީ މަޒްހަބުގެ ހަޒާރާ ދަރިކޮޅުގެ މީހުން ކަމުން، ޕާކިސްތާންގެ ތާލިބާންގެ ހަމަލަތަކުންވެސް އެންމެ ބޮޑަށް އަސަރު ކުރަނީ ބަލޯޗިސްތާންގެ ހަޒާރާއިންނަށެވެ.
ބަލޯޗިސްތާނަކީ ތާލިބާންގެ އިތުރުން ހަނގުރާމަވެރި އިސްލާމީ އެތައް އެހެން ޖަމާއަތެއް ހަރަކާތްތެރިވާ ތަނެވެ. މުސްތަގްބަލުގައި ޕާކިސްތާންގެ އެންމެ ނުރައްކާ އެންމެ ހަމަނުޖެހުން ބޮޑު ސަރަހައްދަކީ ބަލޯޗިސްތާން ކަމުގައި ވެގެންދާނެ ކަމަށް މުހައްލިލުން ދެކެއެވެ.
