ބޭރު ދުނިޔެއިން ރާއްޖެ ބަލައިގަންނަނީ ޑިމޮކްރަސީގެ މަގުގައި ކުރިއަށްދާތީ ކަމަށް ރައްޔިތުންގެެ މަޖިލީހުގެ ރައީސް، އަދި ކުރީގެ ރައީސުލްޖުމްހޫރިއްޔާ، ރައީސް މުހައްމަދު ނަޝީދު ވިދާޅުވެއްޖެއެވެ.
ނަޝީދު މިހެން ވިދާޅުވީ އދގެ 76 ވަނަ އާއްމު މަޖިލީހުގެ ރައީސް ކަމަށް ރާއްޖޭގެ ފޮރިން މިނިސްޓަރު އަބްދުﷲ ޝާހިދު އިންތިހާބުވުމާ ގުޅިގެން މަޖިލީހުން ނެރުނު ބަޔާނެއްގައެވެ.
ނަޝީދު ވިދާޅުވީ ރާއްޖެ ބައިނަލްއަގުވާމީ އާއިލާއަށް ހުޅުވި, ގިނަ ޕާޓީ އެކުލެވޭ ސިޔާސީ ނިޒާމު ބަލައިގަނެ, ޑިމޮކްރަސީގެ މަގުގައި ކުރިއަށްދާކަމީ ބައިނަލްއަގުވާމީ އާއިލާއިން ވެސް ރާއްޖެ ބަލައިގަންނަ އެންމެ އެންމެ ބޮޑު އެއް ސަބަބު ކަމަށެވެ.
"އދގެ 76 ވަނަ އާންމު މަޖިލީހުގެ ރިޔާސަތު ދިވެހިރާއްޖެއިން ބަލައިގަންނާނީ ފަޚުރުވެރި ގައުމެއްގެ ގޮތުގައި" ނަޝީދު ވިދާޅުވިއެވެ.
އަދި ޝާހިދަކީ ހާރިޖީ، ސިޔާސީ ދާއިރާގައި ފާހަގަކޮށްލެވޭ ފަހުރުވެރި ހިދުމަތްތަކެއް ކުރައްވާފައިވާ ކުޅަދާނެ ޑިޕްލޮމޭޓެއް ކަމަށްވެސް ނަޝީދު ވިދާޅުވިއެވެ. އަދި އދ. ގެ 76 ވަނަ ދައުރަށް ރާއްޖެ އިންތިހާބުވުމަކީ ރާއްޖެ ފަދަ ޖަޒީރާ ގައުމުތަކަށާއި މޫސުމަށް އަންނަ ބަދަލުތަކުގެ ސަބަބުން އެންމެ ބޮޑަށް ގެއްލުންވާ ހުރިހާ ގައުމަކަށް ވެސް ލިބުނު ކާމިޔާބީއެއް ކަމަށް ރައީސް ވިދާޅުވިއެވެ.
