ލަންކާގައި މީސްމީޑިއާ މެދުވެރިކޮށް ދޮގުވާހަކަ ފަތުރާނަމަ ހަތަރު ގާނޫނެއްގެ ދަށުން މީހާއާ ދެކޮޅަށް ފިޔަވަޅު އަޅާނެކަމަށް ލަންކާ ސަރުކާރުން އިންޒާރު ދީފިއެވެ.
ހަރުކަށި ފިޔަވަޅުތައް ސްރީލަންކާއިން އަޅާނެކަމަށް އިންޒާރު ކޮށްފައި ވަނީ އިންފޮމޭޝަން ޓެކްނޮލޮޖީ ސޮސައިޓީ ސްރީލަންކާގެ ރައީސް ރާޖީވް މެތިއު ހައްޔަރުކުރުމަށް ފަހުއެވެ.
ފުލުހުން ބުނިގޮތުގައި މީސްމީޑިއާގައި ވާހަކަ ފަތުރާ މީހުންނާ ދެކޮޅަށް ފިޔަވަޅު އަޅާނީ ފުލުހުންގެ ގާނޫނާއި ޓެރަރިޒަމް މަނާކުރާ ގާނޫނާއި ކޮމްޕިއުޓަރ ކްރައިމްސްގެ ގާނޫނާއި ގަނޫނުލްއުގޫބާތާއި އެނޫންވެސް އެހެނިހެން ގަނޫނުތަކާ އެއްކޮށްގެންނެވެ.
ލަންކާ ފުލުހުން، މެތިއު ހައްޔަރުކޮށްފައި ވަނީ ލަންކާގެ ސަރުކާރުގެ ވެބްސައިޓްތަކެއް ހެކްކުރިކަމަށް ބުނެ މީސްމީޑިއާގައި އޭނާ ވަހަކަ ދެއްކުމުންނެވެ. ހަގީގަތަކީ ލަންކާގެ ވެބްސައިޓްތަކެއް ބަޔަކު ބޭރުން ހެކްކުރިއެވެ. އެކަމަކު ސަރުކާރުން އެކަމަކަށް އެއްބަހެއް ނުވެއެވެ.
ލަންކާ ސަރުކާރަކީ މީސްމީޑިއާގައި އުޅޭ ވާހަކަތަކާއި ނޫސްވެރިން ލިޔާ ލިޔުންތަކަށްވެސް އެލާޖިކް ވާ ސަރުކާރެކެވެ.
އިހަށް ދުވަހު ނޫސްވެރިން ވަނީ ހެލްތު މިނިސްޓަރ ނޫސްވެރިންގެ ކިބައިން މައާފަށް އެދިވަޑައިގަތުމަށް ވެސް ގޮވާލާފައެވެ. ލަންކާ ހެލްތު މިނިސްޓަރ ވަނީ ކޮވިޑް19ގެ ވަބާގައި ފްރޮންރްޓްލައިން ގައި މަސައްކަތް ކުރުމުގެ ތެރޭގައި މަރުވި ނޫސްވެރިންނަށް މަލާމާތް ކުރައްވާފައެވެ. ފާއްދާލާފައިވާ އޯޑިއޯއެއްގައި ވަޒީރު، މަރުވި ނޫސްވެރިން ސިފަ ކުރެއްވީ ތިން ވަނަ ދަރަޖައިގެ ނޫސްވެރިންގެ ގޮތުގައެވެ. މި މައްސަލަ އަދިވެސް ހިނދިފައެއް ނުވެއެވެ.
