ރައްޔިތުންގެ މަޖިލީހުގެ އިމްތިޔާޒާއި ސުލޫކު ކޮމެޓީގެ ސްކްރީން ޝޯޓެއް ލީކު ވުމުން އެ ކޮމެޓީގެ ބައްދަލުވުންތައް އޮންލައިންކޮށް ނުބާއްވަން ނިންމައިފިއެވެ.
އިމްތިޔާޒާއި ސުލޫކް ކޮމިޓީން މިފަދައިން ބުނެފައިވަނީ ޒަމީލް މައްސަލައިގައި އެކޮމިޓީން ސިއްރުން ކުރިއަށްގެންދިޔަ ބައްދަލުވުމުގައި ވޯޓަށް އެހުނު ކަންކަން ހާމަކުރުމަށް އެ ކޮމިޓީގެ މެމްބަރުން ފާސްކުރުމާ ގުޅިގެން ނެރުނު ނޫސްބަޔާނެއްގައެވެ.
އެ ގޮތުން އެ ކޮމިޓީން ނެރުނު ނޫސްބަޔާނުގައި ބުނެފައިވަނީ، މަޖިލީހަށް ވަކިވަކި ސިފައިންގެ ބަދަލުގައި ޖަވާބުދާރީވާނީ ދިފާއީ ބާރުންކަމަށް ބުނެ ހުށަހެޅި ސިޓީއާ ގުޅިގެން ޑިފެންސް މިނިސްޓްރީގެ ނައިބުގެ މައްސަލަ ބެލުމަށް މަޖިލީހުގެ ރައީސް ފޮނުއްވާފައިވަނީ ޖޫން 6 ވަނަ ދުވަހު ކަމަށެވެ. އަދި އެ މައްސަލަ ކޮމިޓީއަށް ލިބުމާގުޅިގެން އެރޭ 10:15 ގައި ކޮމިޓީގެ ސިއްރު ބައްދަލުވުމެއް ކުރިއަށް ގެންގޮސްފައިވާކަމަށެވެ.
އެ ބައްދަލުވުމުގައި ކޮމިޓީއަށް ހުށަހެޅި ތާއީދުލިބުނު ހުށަހެޅުންތައް ތަރުތީބުން ވޯޓަށް އެހުނުކަން ފާހަގަކޮށް ކޮމިޓީން ނެރެފައިވާ ނޫސްބަޔާނުގައި ބުނެފައިވަނީ، އެންމެ ފުރަތަމަ ހުށަހެޅި ތާއީދު ލިބުނު ހުށަހެޅުންކަމުގައިވާ، ރައްޔިތުންގެ މަޖިލީހުގެ ސަލާމަތީ ހިދުމަތްތަކާބެހޭ ކޮމިޓީން މިހާރުވެސް ޕާލިމެންޓަރީ އިންކުއަރީއެއް ކުރިއަށް ގެންދަވަމުންދާކަމަށާއި، ހާޒިރު ކުރައްވަންޖެހިވަޑައިގަންނަވާ ފަރާތައް ހާޒިރުކުރައްވަމުންދާކަމަށާއި، އަދި ހަމައެއާއެކު ސިޔާސީ ބޭފުޅަކު ލިޔެމެއްގައި ސޮއިކުރައްވާފައި ފޮނުއްވުމަކީ އެއްވެސް ހާލެއްގައި އެބޭފުޅެއްގެ މައްސަލަ ނެގިދާނެކަމެއްކަމަށް ޤަބޫލުނުކުރެވޭކަަށާއި، މިކަމުގައި ވަރަށް ގިނަ ޤާނޫނީ މައްސަލަތަކެއް ހުރުމުން، މި މައްސަލައަކީ މަޖިލީހުގެ އިމްތިޔާޒް ކޮމިޓީއަށް ބެލިދާނެ މައްސަލައެއް ކަމަށް ޤަބޫލުކުނުކުރެވޭތީ މައްސަލަ ކޮމިޓީން ބޭރުކުރުމަށް ފެންނަކަމަށް ހުށަހެޅި ތާއީދު ލިބުނު ހުށަހެޅުން، އެ ވަގުތު ކޮމިޓީގައި ހާޒިރުވެވަޑައިގެން ވޯޓުގައި ބައިވެރިވެވަޑައިގެންނެވި މެމްބަރުންގެ އަޣުލަބިއްޔަތުން ފާސްވެފައިވާކަމަށެވެ.
ޒަމީލްގެ މައްސަލަ ކޮމިޓީން ބޭރުކުރި މައްސަލައިގައި އެމްޑީޕީގެ މެމްބަރުންގެ މެދުގައި ވަނީ ވަރަށް ބޮޑަށް ނުތަނަވަސްކަން އުފެދިފައެވެ. އެގޮތުން އެ މައްސަލަ ކޮމިޓީން ބޭރުކުރުމަށް އަލިފުށި ދާއިރާގެ މެމްބަރު މުހައްމަދު ރަޝީދު ހުސައިން (ބިގޭ) އެ ކޮމިޓީގައި ހިމެނޭ އެމްޑީޕީގެ ވަކިވަކި މެމްބަރުންނަށް ގުޅާ އެންގިކަމަށް މަޖިލީހުގެ ނައިބު ރައިސް އީވާ އަބްދުﷲ ވަނީ ތުހުމަތު ކުރައްވަފައެވެ. އަދި ވަކިވަކި ސިފައިން ކޮމިޓިއަށް ހާޒިރުނުކުރުމަށް ބާރު އަޅުއްވަނީ ރައިސް އިބްރާހިމް މުހައްމަދު ސޯލިހް ކަމަށާއި، ފޮރުވަން އުޅެނީ ކޮން ކަމެއްކަން ސާފުނުވާކަމަށް ބުނެ ރައީސް ނަޝިދު ވަނީ ބޮޑެތި ތުހުމަތުތަކެއް ކުރައްވާފައެވެ.
އެހެންނަމަވެސް މަޖިލީހުގެ އިންކުއަރިއަށް އަންނަނީ ވަކިވަކި ސިފައިން ހާޒިރުވެ ޖަވާބުދާރީ ވަމުންނެވެ. އެގޮތުން ރައީސް ނަޝީދުގެ ބޮޑީގާތުން ވަނީ އިއްޔައާއި މިއަދު އިންކުއަރީއަށް ހާޒިރުވެ ޖަވާބުދާރީ ވެފައެވެ.
