ރާާއްޖޭގައި ފުރަތަމަފަހަށް ބޭއްވި އެންޓި ޓޯޗަރ ތަމްރީނު ޕްރޮގްރާމް 42 ފުލުހުން ފުރިހަމަ ކޮށްފި އެވެ.
މިއީ ހިއުމަން ރައިޓްސް ކޮމިޝަން އޮފް ދަ މޯލްޑިވްސް (އެޗްއާރްސީއެމް) އިން ތައްޔާރުކޮށް ދިވެހި ފުލުހުންނާއި ގުޅިގެން ކުރިއަށް ގެންދިޔަ ޕްރޮގްރާމެކެވެ.
މި ޕްރޮގްރާމް ނިންމި ބައިވެރިންނަށް ސެޓްފިކެޓް ހަވާލު ކުރުމުގެ ރަސްމިއްޔާތު ބާއްވާފައިވަނީ ވަރޗުއަލްކޮށް މިއަދު އެވެ. މި ރަސްމިއްޔާތު ޝަރަފްވެރިކޮށްދެއްވީ ކޮމިޝަނަރ އޮފް ޕޮލިސް މުޙައްމަދު ޙަމީދު އެވެ.
އޭޕްރިލް 2 ން 8 ވަނަ ދުވަހުގެ ނިޔަލަށް ކުރިއަށް ގެންދިޔަ މި ޕްރޮގްރާމާއި ގުޅޭގޮތުން ސީޕީ ޙަމީދު ވަނީ އެންޓި ޓޯޗަރ އާ ދެކޮޅަށް އެޗްއާރްސީއެމް އިން ކުރަމުން ގެންދާ މަސައްކަތް ވަރަށް އުފަލާއެކު ފާހަގަ ކުރައްވާފަ އެވެ. އަދި އޮންލައިންކޮށް މިކަން ފާހަގަ ކުރުމަކީ ދުވަހާ ވަރަށް ގުޅޭ ކަމެއް ކަމަށް ވެސް ވަނީ ފާހަގަ ކުރައްވާފަ އެވެ.
މީގެ އިތުރުން ހަމީދު ވިދާޅުވީ ކޮވިޑް-19 ގެ މި ދަތި ހާލަތުގައި ވެސް އެޗްއާރްސީއެމް އިން އިސްނަގައިގެން މިފަދަ ޕްރޮގްރާމެއް ރާވާ، ކުރިއަށް ގެންދިޔަ ކަމީ، ފުލުހުންނަކީ ރައްޔިތުންނަށް ޚިދުމަތް ދިނުމުގައި ގާބިލު، ހުނަރުވެރި އަދި އިންސާނީ ކަރާމަތަށް ފުރިހަމައަށް ކަމޭހިތުމަށްޓަކައި އެޗްއާރްސީއެމް ގެ ދައުރުގެ ތެރެއިން ވެވުނު ވަރަށް މުހިންމު މަސައްކަތެއް ކަމަށެވެ.
މިއީ ދެ މުވައްސަސާ ގުޅިގެން ކުރަން ފެށުނު މުހިންމު މަސައްކަތެއް ކަމަށާއި މިފަދަ ޕްރޮގްރާމުތައް ކުރިއަށް ގެންގޮސްދިނުމަށް ސީޕީ ހަމީދު ވަނީ އެދިވަޑައިގެންފަ އެވެ.
