އެއަރބަސް މަތިންދާބޯޓްތަކަށް އިންޖީން ފޯރިވައި ދިނުމުގެ ގޮތުން އިންޑިއާ އަށާއި ދެކުނު އޭޝިއާއަށް އެއަރބަސްގެ އިންޖީނު މަރާމާތު ކުރާ މަރުކަޒެއް އިންޑިއާގައި ގާއިން ކުރުމަށް އެއަރބަސް އިން ނިންމައިފިއެވެ. މި މަރުކަޒު އެއަރބަސް ކުރިންފުނިން ބިނާ ކުރާނީ ޖެނެރަލް އިލެކްޓްރިކް ކުންފުންޏާ ގުޅިގެންނެވެ. އިންޑިއާއިން އެއަރބަސް އާ ގުޅިގެން މި މަރުކަޒު ގާއިމް ކުރާނީ އިންޑިގޯ އެއަރލައިނުންނެވެ. އިންޑިގޯއަކީ ގިނަ އަދަދަކަށް އެއަރ ބަސް ގެންގުޅޭ އަދި އައު އެއަރބަސް ބޯޓްތައް ގަތުމަށް މަސައްކަތް ކުރާ ކުންފުންޏެކެވެ.
މި މަރުކަޒު އުފެދުމާއެކު، ފުރަތަމައަށް އެއަރބަސް އޭ 320 މަރުކާގެ ބޯޓްތަކުގެ އިންޖީނު މަރާމާތު ކުރުމުގެ މަސައްކަތް ކުރިއަށް ގެންދާނެއެވެ.
އެއަރބަސް އިން މި މަރުކަޒު ބިނާ ކުރުމަށް ވިސްނަމުން ދަނީ، ދެ ތަނަކަށެވެ. އެއް ތަނަކީ، ހައިދަރްއާބާދެވެ. އަނެއް މަރުކަޒަކީ، ނިއުދިއްލީގައި އަލަށް ބިނާ ކުރާ އެއަރޕޯޓެކެވެ. މިއިން ވަކި ތަނަކަށް އަދި އެއްބަސްވެފައެއް ނުވެއެވެ.
މި މަރުކަޒު ބިނާ ކުރުމާއެކު، އިންޑިއާގެ ވައިގެ ދަތުރުފަތުރުގެ ދާއިރާ ހަރުދަނާ ވެގެންދާނެއެވެ. އިންޑިއާގެ އެއަރލައިންތަކުން ދަނީ، އައު ބޯޓްތައް ގަތުމަށް މަސައްކަތް ކުރަމުންނެވެ. އިންޑިގޯ އެއަރލައިނުން ވަނީ އައު ބޯޓްތައް ގަތުމަށް 20 ބިލިއަން ޑޮލަރުގެ ކޮންޓްރެކްޓެއް އެކުލަވައިލާފައެވެ.
