ޤައުމީ ޔުނިވާސިޓީގެ އެސިސްޓަންޓް ޕްރޮފެސަރ ކަމުގެ މަގާމުގައި ހުންނެވި ރާއްޖޭގެ މަޝްހޫރު ދީނީ ޢިލްމުވެރިޔާ ޑރ. މުޙައްމަދު އިޔާޒް ޢަބްދުއްލަތީފު، އެ މަގާމުން ވަކިކޮށްފިއެވެ.
އެމްއެންޔޫގެ ވައިސް ޗާންސިލަރު ޑރ. މުހައްމަދު ޝަރީފް ބައެއް މީޑިޔާތަކަށް މައުލޫމާތު ދެއްވަމުން ވިދާޅުވެފައިވަނީ އިޔާޒު ވަކިކޮށްފައިވަނީ ތަފާތު އެކި ފަހަރުމަތިން ނަސޭހަތްދީގެން ވެސް އިސްލާހުނުވުމާ ގުޅިގެން ކަމަށެވެ.
އިޔާޒު އެ ވަޒީފާއިން ވަކިކޮށްފައިމިވަނީ އަންހެން ކުދިން ހިތާނުކުރުމަށް ހިތްވަރުދޭ ކަމަށް ބުނެ އިޔާޒު ކުރެއްވި ޓްވީޓެއްގެ މައްސަލަ އިސްލާމިކް މިނިސްޓްރީން ބަލަމުން ދަނިކޮށެވެ.
"ފީމޭލް ޖެނިޓަލް މިއުޓިލޭޝަން" (އެފްޖީއެމް)އަށް ހިތްވަރު ދިން ކަމަށް ބުނެ ޑރ. އިޔާޒާ ދެކޮޅަށް ރައްޔިތުންގެ މަޖިލީހަށް ވަނީ މައްސަލައެއް ވެސް ހުށަހަޅާފައެވެ.
ފާޑުކިޔުންތަކާއި ތުހުމަތުތަކާ ގުޅިގެން މިދިޔަ ޖުލައި މަހުގެ 25 ވަނަ ދުވަހު ޑރ. އިޔާޒް ވަނީ ބަޔާނެއް ވެސް ނެރުއްވައިފައެވެ. އެބަޔާނުގައި އެމަނިކުފާނު ވިދާޅުވީ އަންހެންކުދިން ހިތާނު ކުރަން ހިތްވަރު ދޭފަދަ ގޮތަކަށް އެއްވެސް އިރަކު ވާހަކަ ނުދައްކަވާ ކަމަށާއި އެކަމަށް މާފަށް އެދޭ ކަމަށެވެ.
