އައްޑޫ ސިޓީން ކޮވިޑަށް ޕޮޒިޓިވްވެފައިވާ މީހުންގެ ތެރެއިން ބަލިން ފަސޭހަވި އިތުރު 11 މީހުން މިއަދު ދޫކޮށްލައިފި ކަމަށް އައްޑޫ އެކުއެޓޯރިއަލް ހޮސްޕިޓަލް (އޭއީއެޗު) އިން ވިދާޅުވެއްޖެއެވެ.
އައްޑޫއިން ޖުމްލަ 473 މީހުން ވަނީ މިހާތަނަށް ޕޮޒިޓިވްވެފައެވެ. މިއަދު ދޫކޮށްލި 11 މީހުންނާއެކު ބަލި ފަސޭހަވި މީހުންގެ ޖުމްލަ މިހާރުވަނީ 415 އަށް އަރައިފައެވެ.
މިއަދު އައްޑޫ އިން މިބައްޔަށް ޕޮޒިޓިވްވެފައިވަނީ 3 މީހެކެވެ. އެއީ ބަލިޖެހިފައިހުރި މީހަކާ ދިމާވުމުގެ ސަބަބުން ޑައިރެކްޓް ކޮންޓެކްޓުންގެ ގޮތުގައި ތިބި 2 ބިދޭސީއަކާއި ހޯމް ކަރަންޓީނުގައި ހުރި ދިވެއްސެކެވެ. މި ތިން މީހުން ވެސް ޕޮޒިޓިވް ވެފައި ވަނީ ހިތަދޫއިންނެވެ.
އައްޑޫއިން އިއްޔެ ޕޮޒިޓިވް ވެފައިވަނީ 4 މީހުންނެވެ. އެއީ މަރަދޫން ޕޮޒިޓިވްވި ތިން ބިދޭސީއަކާއި ދިވެއްސެކެވެ. އެ ތިން ބިދޭސީންނަކީ މަސްވެރިންނެވެ. ދިވެހި މީހާއަކީ ހޯމްކަރަންޓީނުގައި ހުރި މީހެކެވެ.
އައްޑޫ އިން މިއަދު ޕޮޒިޓިވްވި 3 މީހުންނާއެކު އެކްޓިވް ކޭސްގެ ޖުމްލަ އަދަދަކީ 56 އެވެ. އެއީ ހިތަދޫގައި ތިބި 46 މީހަކާއި މަރަދޫގައި ތިބި 10 މީހެކެވެ.
މި ބަލީގައި މިހާތަނަށް އައްޑޫ އިން ވަނީ 2 މީހަކު ނިޔާވެފައެވެ. ޑައިރެކްޓް ކޮންޓެކްޓުންގެ އަދަދު މިހާރުވަނީ 143 އަށް މަދުވެފައެވެ.
