ކުޑަކުދިންގެ އަހުލާގާ ގުޅުން ހުރި 4 މައްސަލަ މެއި މަހު ޖެންޑަރ މިނިސްޓްރީއަށް ހުށަހަޅައިފި އެވެ.
އެ މިނިސްޓްރީން ބުނީ އެ ފަދަ މައްސަލަތަކުގެ ތެރޭގައި ސްކޫލަށް ދާން ބޭނުން ނުވުމުގެ 2 މައްސަލަ ހިމެނޭ ކަމަށެވެ. އަދި ހައްގުތަކުން ކުޑަކުދިން މަހްރޫމުކުރުމުގެ 5 މައްސަލަ ހިމެނޭ އިރު، އެއީ ތައުލީމަށް ހުރަސްއެޅުމުގެ 4 މައްސަލަ އާއި އުފަންވުން ރަޖިސްޓްރީ ކުރުމާބެހޭ މައްސަލައެއް ކަމަށް ވަނީ ބުނެފަ އެވެ.
މެއި މަހު، ގާނޫނާއި ގަވާއިދާ ޚިލާފުވުމުގެ 3 މައްސަލަ ހުށަހަޅާފައިވާއިރު، އެއީ މާރާމާރީ ހިންގުމުގެ 1 މައްސަލައާއި ވައްކަން ކުރުމުގެ 1 މައްސަލައެއް ކަމަށް އެ މިނިސްޓްރީން ބުނެ އެވެ. އަދި އާއިލީ މައްސަލަތަކުގެ ތެރޭގައި ކުދިން ބެލުމުގައި ޖެހޭ 6 މައްސަލަ އާއި ހަޟާނާތު ނުވަތަ ކުދިންނާ ބައްދަލުނުކުރެވޭ 6 މައްސަލަ ހިމެނެ އެވެ.
ހަމައެހެންމެ ނުކުޅެދުންތެރިކަން ހުންނަ ފަރާތްތަކާއި އުމުރުން ދުވަސްވީ މީހުނަށް އަޅައިލުމާއި އެހީތެރިކަން ބޭނުންވެގެން 15 މައްސަލަ މެއި މަހު މިނިސްޓްރީއަށް ވަނީ ހުށަހަޅާފަ އެވެ. އެއީ ނުކުޅެދުންތެރިކަން ހުންނަ މީހުންނަށް އަޅައިލުމާއި އެހީތެރިކަން ބޭނުންވެގެން ހުށަހަޅައިފައިވާ 9 މައްސަލައާއި، އުމުރުން ދުވަސްވީ މީހުންނަށް އަޅައިލުމާއި އެހީތެރިކަން ބޭނުންވެގެން ހުށަހަޅާފައިވާ 6 މައްސަލަ އެވެ.
ޖެންޑަރ މިނިސްޓްރީން ބުނީ މެއި މަހުގެ ނިޔަލަށް ދައުލަތުގެ ބެލުމުގެ ދަށުގައި ތިބީ ޖުމުލަ 216 ކުދިން ކަމަށެވެ.
