އިންޑިއާގައި އޮންލައިން ވިޔަފާރި ފުޅާވެގެން ދިއުމާ ގުޅިގެން 2025އާ ހަމައަށް އިންޑިއާގެ އޮންލައިން ވިޔަފާރި 188 ބިލިއަން އެމެރިކާ ޑޮލަރަށް އިތުރުވެގެންދާނެ ކަމަށް ލަފާ ކުރެވެއެވެ. މިދިޔަ އަހަރު އިންޑިއާގައި އޮންލައިން ވިޔަފާރި އުޅުނީ، 64 ބިލިއަން ޑޮލަރުގައެވެ.
އިންޑިއާގެ ޑިޖިޓަލް މާކެޓްޕްލޭސްގެ ކުރިމަގާ ބެހޭ ގޮތުން ފީޗީން ނެރެފައިވާ ރިޕޯޓްގައި ބުނެފައި ވަނީ އިންޑިއާގައި އޮންލައިން ވިޔަފާރިއަކީ މީހުންގެ މެދުގައި ވިޔަފާރި ކުރުމުގައި ބޭނުން ކުރާ މައި ބާޒާރެވެ.
އޮންލައިންގެ ވިޔަފާރީގެ ދާއިރާއަށް ބާއްވާފައިވާ ވެބިނާރެއްގައި ވާހަކަ ދެއްކި މި ދާއިރާގެ ފަރާތްތަކުން ބުނެފައި ވަނީ މީހުން މައިގަނޑު ގޮތެއްގައި ވިޔަފާރި ކުރާ ތަނަކީ އޮންލައިން ފިހާރަތައް ކަމުން މީހުންގެ އިތުބާރު ހޯދުމާއި ދެފުށް ފެންނަ ގޮތަށް ވިޔަފާރީގެ މުއާމަލާތުތައް ހިންގުމަކީ މިހާރު ވަރަށް މުހިންމު ކަމެކެވެ.
އިންޑިއާގެ ކޮމާސް މިނިސްޓްރީން ބުނިގޮތުގައި ކޮންސިއުމަރުންގެ ހައްގުތައް ރައްކާތެރި ކުރުމަށާއި އަދި ކޮންސިމަރުންގެ އިތުބާރު އާލާ ކުރުމުގެ ގޮތުން ބައެއް ކަންކަން ހަރުދަނާ ކުރަން ޖެހިފައި ވެއެވެ. އިންޑިއާ ސަރުކާރުން ބުނާ ގޮތުގައި އޮންލައިން ވިޔަފާރީގައި ވާދަވެރި ވާސާއެއް ބިނާވެފައި އޮތުމަކީ، ސިނާއީ ފަރާތްތަކާއި ކޮންސިއުމަރުންގެ ހައްގުތައް ރައްކާތެރިކުރުމަށް އެންމެ ބޭނުންތެރި ގޮތް ކަމުގައެވެ.
