އެމެރިކާގެ ކޮމާސް ޑިޕާޓްމަންޓުން ވަނީ، ޗައިނާގެ 34 ކުންފުންޏެއް ބްލެކްލިސްޓް ކޮށްފައެވެ. މި ކުންފުނިތަކަކީ ޗައިނާގައި މަސައްކަތް ކުރާ ކުންފުނިތަކެވެ. އަދި އެމެރިކާއިން މިކުންފުނިތަކާ ދެކޮޅަށް ފިޔަވަޅު އެޅީ އެމެރިކާގެ ޚާރިޖީ ސިޔާސަތާ ފުށުއަރާފަދަ ކަންތައްތައް މި ކުންފުނިތަކުން ކުރަމުން ދިއުމާ ގުޅިގެންނެވެ.
މީގެ އިތުރުން މިކުންފުނިތަކަކީ، ގިނަ އަދަދަކަށް އުއިގޫރު މީހުން ބަންދު ކުރުމާއި އެމީހުންނަށް ފާރަވެރިވާ ޓެކްނޮލޮޖީ އުފައްދައި ސަރުކާރަށް ދިނުމުގައި ހަރަކާތްތެރިވާ ކުންފުނިތަކެވެ.
އެމެރިކާއިން ބުނާ ގޮތުގައި ޝިންޖިއާންގައި ޗައިނާއިން ހިންގާ އަމަލުތަކަކީ، އުއިގޫރު ނަސްލު ނެތިކޮށްލުމުގެ އަމަލުތަކެވެ. އަދި މިއީ އިންސާނިއްޔަތާ ޚިލާފް އަމަލުތަކެއް ކަމަށްވެސް އެމެރިކާއިން ސިފަ ކުރެއެވެ.
މި ލިސްޓްގައި ހިމެނޭ ފަސް ކުންފުންޏަކީ ޗައިނާ ސިފައިންނަށް ލޭޒަރ އުފައްދައި ދިނުމަށް މަސައްކަތް ކުރާ ކުންފުނިތަކެވެ.
އެމެރިކާގެ ޚާރިޖި ވުޒާރާއިން ބުނެފައި ވަނީ މިކުންފުނިތަކާ ދެކޮޅަށް ފިޔަވަޅު އަޅާފައި ވަނީ އިންސާނިއްޔަތާ ޚިލާފް އަމަލުތައް ހިންގާތީއާއި ޗައިނާގެ އަސްކަރީ ކަންކަން ޒަމާނީ ގޮތަށް ބަދަލު ކުރުމަށް ކުރާ މަސައްކަތުގައި އެހީވެ ދޭތީއެވެ. އަދި އެމެރިކާއިން އެކްސްޕޯޓް ކުރުން މަނާކޮށްފައިވާ ތަކެތި އީރާނާއި ޗައިނާއާއި ރަޝިޔާއަށް އެކްސްޕޯޓް ކުރާ ފަރާތްތަކާ މެދު ފިޔަވަޅު އަޅަމުން ގެންދާނެ ކަމަށެވެ.
