ދެކުނު ކޮރެއާގެ އެންމެ ބޮޑު އިދިކޮޅު ޕާޓީން މަސައްކަތް ކުރަމުން ދަނީ ޑިމޮކްރެސީ އާލާ ކުރުމަށާއި އަދި ޑިމޮކްރެސީއާ ދެކޮޅަށް މަސައްކަތް ކުރާ ފަރާތްތަކާ ދެކޮޅަށް އަޑު އުފުލުމަށެވެ. އުމުރުން 36 އަހަރުގެ ލީ ޖުން ސޯކް ވަނީ ކޮންސެވެޓިވް ޕާޓީގެ ލީޑަރުކަމަށް ހަމަޖައްސާފައެވެ. އޭނާއަކީ ހަރވަރޑް ގްރެޖުއޭޓެކެވެ.
ޑިމޮކްރެސީއާ ދެކޮޅުވެރި ފަރާތްތަކާ ދެކޮޅަށް އަޑު އުފުލުމަކީ އޭނާގެ އަމާޒެއްކަމުގައި ހަދާފައި ވެއެވެ. އަދި ހޮންގކޮންގގެ މައްސަލާގައި އޭނާގެ ކޮންޒަރވެޓިވް ޕާޓީން ދެކޭ ގޮތް ހާމަކުރާނެ ކަމަށެވެ.
އޭނާ ވިދާޅުވިގޮތުގައި އޭނާގެ މަގްސަދަކީ ކޮންސަރވެޓިވް ޕާޓީން ރިއާސީ އިންތިޚާބް ކާމިޔާބު ކުރުމެވެ.
ލީގެ ވާހަކަތަކުން ދޭހަވާ ގޮތުގައި އޭނާއާއި ބައިވެރިން ގެންގުޅުއްވާނީ ހަރުކަށި ސިޔާސީ ފިކުރެކެވެ. އަދި ޗައިނާއާ ދެކޮޅުވެރި ސިޔާސަތެކެވެ. އެހެންވެ ދެކުނު ކޮރެއާގައި ޗައިނާއާ ދެކޮޅު އޮއިވަރެއް ދަނީ ފެތުރިގެންނެވެ.
ލީ ވަނީ 2019ގައި ހޮންގކޮންގ ގައި ޑިމޮކްރެސީއާ އެއްކޮޅަށް ބާއްވާފައިވާ މުޒާހަރާތަކުގައި ބައިވެރިވެ ވަޑައިގެންފައެވެ. އަދި އޭނާ ތުހުމަތު ކުރައްވާ ގޮތުގައި ދެކުނު ކޮރެއާގެ ރައީސް މޫން ޖާއި އިން ގެ ރިއާސަތަކީ ޗައިނާއަށް ޚުޝާމަދު ކުރާ ރިއާސަތެކެވެ.
ހޮންގކޮންގގައި ޑިމޮކްރެސީއަށް ތާއީދު ކުރާ މީހުން ޖަލަށް ލުމާއި އެޕަލް ޑެއިލީ ބަންދުކުރުމުގެ މައްސަލާގައި ދެކުނު ކޮރެއާއިން ޗައިނާއަށް ފާޑުކިޔާފައި ނުވާކަން އެތައް ފަރާތަކުން ފާހަގަކޮށްފައި ވެއެވެ.
