ޗައިނާއިން ދަނީ ޖައްވީ ޓެކްނޮލޮޖީގައި އެމެރިކާއާ ދެމެދު އޮންނަ ފަރަގު ކުޑަ ކުރުމަށް ބޮޑެތި މަސއްކަތްތަކެއް ކުރަމުންނެވެ. ޗައިނާގެ ޖައްވީ އަސްކަރީ ދާއިރާގެ އެއް އިންވެސްޓްމެންޓަކީ، ސެޓެލައިޓް ޖޭމް ކުރުމާއި ސެޓެލައިޓް ހަލާކުކޮށްލުމަށް ބޭނުންވާ ޓެކެނޮލޮޖީ ކަމަށް ބްލޫމްބާރގް އިން ބުނެއެވެ. ޗައިނާގެ ޓެކްނޮލޮޖީ ބިނާ ކުރުން ބިނާ ވެފައި ވަނީ ބިމުންނާއި ޖައްވުންވެސް ހަތިޔާރު ބޭނުންކޮށްގެން ސެޓެލައިޓް ހަލާކު ކޮށްލުން ކަމަށް އެމެރިކާގެ އިންޑޯ ޕެސިފިކް ކޮމާންޑްގެ އިންޓެލިޖެންސް މަސްއޫލުވެރިއާ މީރުބަހުރު މައިކަލް ސްޓޫޑްމަން ވިދާޅުވިއެވެ.
އެމެރިކާއަށް ޖައްވީ ހަތިޔާރުގެ ދާއިރާގައި ގައުމަކުން ބޮޑެތި ގޮންޖެހުންތައް ކުރިމަތިވާ ކަމަށް އެމެރިކާގެ ދިފާއީ ވަޒީރު ލުއޭޑް އޮސްޓިން ވަނީ ވިދާޅުވެފައެވެ. އެމެރިކާއިން ޖައްވީ އަސްކަރީ ބާރެއް އެކުލަވާލުމަށް ބޭނުންވެގެން އެކަމުގެ ދިފާއުގައި ދެއްކި ވާހަކަތަކުގައި ބުނެފައި ވަނީ އެމެރިކާގެ ސެޓެލައިޓްތަކަށް ޗައިނާއިން ދިމާވާން ހުރި ނުރައްކަލާއި ޖައްވީ ދާއިރާގައި ރަޝިޔާއިން ހޯދަމުންދާ ކާމިޔާބީތަކަކީ އެމެރިކާއިން އެކަމަށް ސަމާލުކަން ދޭން ޖެހޭ ކަމެއް ކަމަށެވެ.
ސުޓުޑްމަން ވިދާޅުވިގޮތުގައި އެމެރިކާގެ ވާދަވެރި ގައުމުތަކުން ބޭނުން ވަނީ އެމެރިކާގެ ކުޅަދާނަކަން ވަޒަންކޮށް އެއާ އެއްވަރު ވެގަތުމަށެވެ.
ބިމުން ލޭޒާ ފޮނުވައިގެން ތިރީ އޯބިޓްގައި ހަރަކާތްތެރިވާ ސެޓެލައިޓްތަކަށް ގައުމަކުން ނުރައްކަލެއް އައިސްދާނެ ކަމަށް ބަލައި އެކަމަށް ތައްޔާރު ވުމަށް އެމެރިކާގެ 2022 ބަޖެޓް އެކުލަވާލުމުގައިވެސް މަޝްވަރާ ކޮށްފައިވެއެވެ. މީގައި ޗައިނާގެ ނަން ފާހަގަ ކޮށްފައެއް ނުވެއެވެ.
އެމެރިކާއިން ބުނާ ގޮތުގައި ޖައްވީ އާލާތަށް އޮތް ނުރައްކާ އެމެރިކާއަށް އިހުސާސް ކުރެވޭތީ އެމެރިކާއންވެސް ޚާއްސަ މަސައްކަތްތަކެއް ދަނީ ކުރަމުންނެވެ.
އެމެރިކާއިން މިހާތަނަށް އުފައްދާފައިވާ ޓެކްނޮލޮޖީއަކީ ރަޝިޔާއާއި ޗައިނާގެ ސެޓެލައިޓް ޖޭމްކޮށްލާ ބާވަތުގެ ޓެކްނޮލޮޖީއެވެ. މީގައި ސެޓެލައިޓް ހަލާކު ކުރުމެއް ނޯވެއެވެ. އެމެރިކާގެ މި ހަތިޔާރަށް ދީފައިވާ ނަމަކީ މެޑޯލޭންޑްސް ސިސްޓަމްސްއެވެ.
