ޗައިނާއަށް ދެކުނު އޭޝިއާގައި ފައިތިލަ ހަރުކޮށްލުމަށް ފުރުސަތު ނުލިބުމުން ޗައިނާއިން އިތުރު މަސައްކަތްތައް ކުރަމުންދާ ކަމަށް ކަޓްމަންޑޫ ޕޯސްޓުން ބުނެއެވެ. މި ނޫހުން ބުނިގޮތުގައި މިކަން ފެންނާން އޮތީ ޗައިނާ ސައުތު އޭޝިއާ ޕަވަރޓީ އެލެވިއޭޝަން އެންޑް ކޯޕަރޭޝަން ސެންޓަރ ގާއިމް ކުރުމަށް ޗައިނާއިން ނިންމި ނިންމުމުންނެވެ. ޗޮންޗިންގައި ބުރާސްފަތި ދުވަހު ޗައިނާއިން ވަނީ މި ސެންޓަރ ގާއިމް ކޮށްފައެވެ.
ޗޮންޗިންގައި ބާއްވާފައިވާ ބައްދަލުވުމުގައި ދެކުނު އޭޝިއާގެ ސަރަހައްދީ ޖަމުއިއްޔާ ސާކްގެ މެމްބަރުންގެ ތެރޭން ބައިވެރިވެފައި ވަނީ އެންމެ ފަސް މެމްބަރުންނެވެ. މި ޖަމާއަތުގައި އަށް މެމްބަރުން ތިއްބަވައެވެ.
މިބައްދަލުވުމުގައި ބައިވެރި ވެފައި ނުވާ ތިން ގައުމަކީ، އިންޑިއާއާއި ބޫޓާނާއި ދިވެހިރާއްޖެއެވެ.
ނޭޕާލްގައި، ޚާރިޖީ ދާއިރާގެ މުހައްލިލެއްކަމަށްވާ ދިނޭޝް ބަޓަރާއި ވިދާޅުވަނީ ދެކުނު އޭޝިއާގައި ފަގީރުކަން ނައްތާލުމަކީ ޗައިނާގެ މައިގަނޑު މަގްސަދެއްކަމަށްވާނަމަ، އެ މަސައްކަތުގައި އިންޑިއާ އެކަހެރިކޮށްފައި ވަނީ ކީއްވެގެން ބާވައެވެ؟
ބޫޓާނުން ޗައިނާއާއެކު ސިޔާސީ ގުޅުން ގާއިމް ކޮށްފައެއް ނުވެއެވެ.
އިންޑިއާއާއި ޕާކިސްތާންގެ ދެ ބަސްވުމުގެ ސަބަބުން ސާކް އޮތީ އައްސިވެފައެވެ. އަދި އިންޑިއާއިން މަސައްކަތް ކުރަނީ "ދަ ބޭ އޮފް ބެންގޯލް އިނިޝިއޭޓިވް ފޯމަލްޓި ސެކްޓޯރަލް ޓެކްނިކަލް އެންޑް އިކޮނޮމިކް ކޯޕަރޭޝަން"ގެ ތެރޭން ސަރަހައްދުގެ ގައުމުތަކާއެކު މަސައްކަތްކުރާށެވެ.
ޗައިނާއިން ފަގީރުކަން ނައްތާލުމަށް ޖަމާއަތެއް ހެދުމުގެ ފިކުރެއް ގެންގުޅޭ ކަމަށް ބުނެ މި ޚިޔާލު ފަތުރާފައި ވަނީ މިދިޔަ އެޕްރީލް މަހު ކޮވިޑާ ގުޅިގެން ގައުމުތަކާ އެކު ޗައިނާ ފޮރިން މިނިސްޓަރ ބޭއްވެވި މަޝްވަރާތަކުގައެވެ. އެ ބައްދަލުވުމަށް އިންޑިއާއަށް ދައުވަތު ދިނެވެ. ނަމަވެސް ސަރަހައްދުގެ ހަމަނުޖެހުމުގެ މައްސަލާގައި އިންޑިއާއިން މި ބައްދަލުވުމުގައި ބައިވެރިއެއް ނުވިއެވެ.
