ޕާކިސްތާން ޕީޕަލްސް ޕާޓީގެ ލީޑަރު ބިލާވަލް ބުއްޓޫ ޒަރްދާރީ އެމެރިކާއަށް މަޝްވަރާ ދަތުރެއްގައި ވަޑައިގަތުމުން ޕާކިސްތާންގެ ވެރިކަން ކުރާ ޕާޓީން އެކަން ކުށްވެރިކޮށްފިއެވެ. ވެރިކަން ކުރާ ތަހްރީކޭ އިންސާފް ޕާޓީން ބުނެފައި ވަނީ ބުއްޓޫގެ އެމެރިކާ ދަތުރަކީ، ވެރިކަމަށް އައުމަށްޓަކައި އެމެރިކާގެ މަދަދު ހޯދުމަށް ކުރާ ދަތުރެއް ކަމުގައެވެ. އަދި ތަހްރީކޭ އިންސާފް ޕާޓީން ވެރިކަމުގެ ދައުރު ފުރިހަމަ ކުރާނެ ކަމުގައި ޕާޓީގެ ލީޑާޝިޕްގެ ބޭފުޅުން ވަނީ ވިދާޅުވެފައެވެ.
ޕާކިސްތާންގެ ބޮޑު ވަޒީރު އިމްރާން ޚާންގެ އެއިޑް ޝާހްބާޒް ޖިލް، މަލާމާތްކުރައްވަމުން ވިދާޅުވީ ބުއްޓޫގެ ދަތުރުފުޅަކީ އެމެރިކާ ސަރުކާރަށް އޭނާގެ ސީވީ ހުށަހަޅުއްވައިގެން ވަޒީފާއެއް ހޯއްދެވުމަށް ކުރައްވާ ދަތުރުފުޅެއް ކަމަށެވެ.
އޭނާ ވިދާޅުވީ އެމެރިކާއަށް ބުއްޓޫ ޑީލެއް ދެއްވިކަމުގައި ވިއަސް އޭނާއަށް ވެރިކަމަށް ފުރުސަތެއް ނެތް ކަމަށެވެ. އަދި ޕީޕަލްސް ޕާޓީ އިން ޕާކިސްތާންގެ ވެރިކަމުގައި އޮތް އިރު، އެމެރިކާގެ ޑްރޯންތަކުން 340 ޑްރޯން ހަމަލަ ޕާކިސްތާންގެ ސަރަހައްދުގެ ތެރެއަށް ދީފައިވާނެ ކަމަށެވެ. އަދި މުޝައްރަފްގެ ވެރިކަމުގައި އެމެރިކާ ޑްރޯންތަކުން 13 ޑްރޯން ހަމަލަ ދީފައި ވާކަމަށެވެ.
ޕީޕަލްސް ޕާޓީން ވެރިކަން ކުރާ ޕާޓީއަށް ރައްދު ދެމުން ބުނެފައިވަނީ ޑިޕްލޮމެޓިކް ހިމާޔަތާ ނުލައި ތަހްރީކޭ އިންސާފް ޕާޓީގެ އިސްވެރިންނަށް އެމެރިކާއަށް ވަޑައި ނުގެންނެވޭނެ ކަމަށެވެ. ތަހްރީކޭ އިންސާފް ޕާޓީގެ ވެރިންނާ ދެކޮޅަށް އެމެރިކާގެ ކޯޓްތަކުގައި ދައުވާ އުފުލާފައި ވެއެވެ.
