ޕާކިސްތާނުން ޗައިނާއާ ގުޅިގެން ދުނިޔޭގެ ސުލްޙައަށް މަސައްކަތް ކުރާނެ ކަމަށް ޕާކިސްތާނުން އދއަށް ކަނޑައަޅާފައި ހުންނަވާ ދާއިމީ މަންދޫބް މުނީރު އަކުރަމް ވިދާޅުވެއެވެ. ޗައިނާ ކޮމިއުނިސްޓް ޕާޓީގެ 100 އަހަރު ފުރުން ފާހަގަ ކުރުމަށް މަޖާޒީގޮތަށް ގައުމުތަކުގެ މަންދޫބުން ފޮނުވި މެސެޖްތަކާއެކު އަކްރަމް ވިދާޅުވީ، އޭނާއަށް މި މުނާސަބާގައި އެއްޗެއް ވިދާޅުވާން ލިބުނު ފުރުސަތަކީ ޝަރަފެއް ކަމަށާއި ކޮމިއުނިސްޓް ޕާޓީ ވުޖޫދަށް އައުމަކީ ދުނިޔޭގެ ތާރީޚްގައި ބޮޑު ތާރީޚީ ހާދިސާއެއް ކަމަށެވެ.
ސަތޭކަ އަހަރުގެ ތެރޭގައި ޗައިނާއިން ވަނީ ނާއުންމީދާއި ފަގީރުކަމުން އެގައުމުގެ އާބާދީ ކާމިޔާބީގެ ހަރުފަތްތަކަކަށް އުފުލައި ދީފައި ކަމުގައި އޭނާ ވިދާޅުވިއެވެ.
ޗައިނާއިން މުޅިގައުމުވެސް ބަދަލުކޮށްލައި، އެންމެން އެކަތިގަނޑަކަށް ހަދާފައިވާ ކަމަށާއި އަދި ފަގީރުކަން ނައްތާލައި އުމުރާނީ ތަރައްގީއާއި ވިޔަފާރީގެ މައިދާނުގައި ފެންވަރު ރަނގަޅު ކުރުމާއި ސިނާއަތުގެ ދާއިރާގައި ކާމިޔާބު ހޯދުމާއި ފަންނީ ގޮތުން ކުރިއަރައިގެން ދިއުމަކީ ތާރީޚްގެ ފަށްފުށްތަކުން މީގެ ކުރިން ގައުމެއްގެ ފުށުން، މިފަދައިން ފެނިގެން ގޮސްފައިވާ ކަމެއް ނޫން ކަމުގައި އަކުރަމް ވިދާޅުވިއެވެ.
ޕާކިސްތާންގެ ބޮޑު ވަޒީރު ޢިމްރާން ޚާންގެ ބަސްފުޅަށް ނިސްބަތް ކުރައްވައި އަކުރަމް ވިދާޅުވީ، ޕާކިސްތާންގެ ވެސް އުންމީދަކީ ޗައިނާގެ މިކާމިޔާބީ ޕާކިސްތާންގައި ފަށް ކުރެވިގެން ދިއުމެވެ. އަދި ޗައިނާއިން ދުނިޔޭގެ ސުލްހަ ގާއިމް ކުރުމަށް ކުރާ މަސައްކަތަށް ޕާކިސްތާނުން ފުރިހަމައަށް ތާއިދު ކުރާކަމަށްވެސް އޭނާ ވިދާޅުވިއެވެ.
މުނީރު ވިދާޅުވީ ޕާކިސްތާނަކީ ޗައިނާގެ ޒަމާންވީ ރަޙްމަތްތެރިއެއް ކަމަށެވެ. އަދިވެސް ދެ ގައުމުގެ ގުޅުން ދަނީ އިތުރަށް ތަރައްގީވަމުންކަމުގައި އެމްބެސެޑަރ ވިދަޅުވިއެވެ. އޭނާވެސް ޗައިނާ ސިފަ ކުރެއްވީ ޕާކިސްތާންގެ ހުރިހައި މޫސުމެއްގެވެސް ރަޙުމަތްތެރިޔާގެ ގޮތުގައެވެ.
