އިންޑިއާގެ އީކޮމާސްގައި އުޅޭ ފްލިޕްކާޓް ކުންފުނިން ވަނީ އިތުރު އިންވެސްޓަރުންގެ އަތުން 3.6 ބިލިއަން އެމެރިކާ ޑޮލަރު ހޯދާފައެވެ. މިއީ އިންޑިއާގައި ކުޑަ ކުންފުންޏަކުން މިވަރުގެ ބޮޑު އަދަދެއް ހޯދި ފުރަތަމަ ފަހަރަވެ. ފްލިޕްކާޓަކީ މިހާރު، އެމެރިކާގެ ވޯލްމާޓުން ގަނެގެން އުޅޭ ކުންފުންޏެކެވެ. މި ކުންފުނީގެ އަގު މިހާރު 37.6 ބިލިއަން ޑޮލަރަށް އަރާކަމަށް ލަފާކޮށްފައި ވެއެވެ. އަލަށް ފްލިޕްކާޓްގައި އިންވެސްޓްކޮށްފައިވާ ކުންފުނިތަކަކީ، ކެނެޑާގެ ޕެންޝަން ޕްލޭން ފަންޑުންނާއި ސޮފްޓްބޭންކް ވިޜަންއާއި ޓައިގަރ ގްލޯބަލް އިންނެވެ.
ޕްލިޕްކާޓުން މި ފަންޑާއެކު މަސައްކަތް ކުރަމުން ދަނީ 2022ގައި މިކުންފުނީގެ ހިއްސާ އާންމުންނަށް ވިއްކާށެވެ. މާލީ ދާއިރާގެ ފަރާތްތަކުން ބުނާ ގޮތުގައި މި ފަންޑިންގެ ސަބަބުން މި ކުންފުންޏާ މެދު މީހުންގެ އިތުބާރު އިތުރު ވެގެންދާނެއެވެ.
ފްލިޕްކާޓްގައި 350 މިލިއަން މީހުން ރަޖިސްޓްރީ ކޮށްފައި ވެއެވެ. އަދި ތިން ލައްކައެއްހާ ވިޔަފާރިވެރިން މި ވަސީލަތް ބޭނުންކޮށްގެން މުދާ ވިއްކައެވެ. މިކުންފުނިން އޮނަލްއިންކޮށް މީހުން ގަންނަ މުދަލުގެ 60 އިންސައްތައަކީ، އިންޑިއާގެ ސިޓީތަކުގެ މީހުން ގަންނަ މުދަލެވެ. އަދި މުދާ ޑެލިވަރީއަށްވެސް ލައްކައެއްހާ މީހުން ފްލިޕްކާޓުން ވަޒީފާގައި ގެންގުޅެއެވެ.
