ތުރުކީގައި ހުންނަ ޕާކިސްތާން އެމްބަސީން ކޮށްފައިވާ ޓުއީޓަކުން ނުތަވަސްކަން ވެރިކޮށްލައިފިއެވެ. ޕާކިސްތާން އެމްބަސީގެ ޓުއީޓްގައި ދޭހަކޮށްދީފައި ވަނީ ތުރުކީ ދަރިކޮޅުގެ މީހުން ދިރިއުޅޭ ތުރުކީވިލާތުން މަދަދު ދޭ އުތުރު ސައިޕްރަސްގެ ސަރުކާރު ޕާކިސްތާނުން ބަލައިގަންނަން ވެއްޖެ ކަމަށެވެ.
މިޓުއީޓް ކޮށްފައި ވަނީ ޕާކިސްތާން އެމްބަސީގެ ރަސްމީ ޓުއިޓާ އެކައުންޓުންނެވެ. މި ޓުއީޓަކީ އުތުރު ސައިޕްރަސްއަށް ކޮންސިއުލާ ދަތުރެއްގައި މި މަހު އެމްބަސީ މީހުން ކުރާ ދަތުރާ ބެހޭ މަޢްލޫމާތު ދޭ ޓުއީޓެކެވެ.
ތުރުކީވިލާތަކީ ޕާކިސްތާނާ ވަރަށް ގާތް ގުޅުމެއް އޮންނަ ގައުމެކެވެ. އުތުރު ސައިޕްރަސްއަކީ ތުރުކީގެ ގޮނޑިކޮއްކޮ ސަރުކާރެއް އޮންނަ ތަނެކެވެ.
ނަގޯރްނޯ ކަރަބާޚްގެ ހަނގުރާމައިގައި އަޒަރްބައިޖާނަށް ލިބުނު ކާމިޔާބީއާ ގުޅިގެން ގްރީސްގެ ނޫހަކުން ނެރުނު ރިޕޯޓެއްގައި ބުނެފައި ވަނީ ބައެއް ގައުމުތަކުން އުތުރު ސައިޕްރަސް ބަލައިގަންނަން ތައްޔާރު ވާކަމަށެވެ. އޭގެ ތެރޭގައި އަޒަރްބައިޖާން، ޕާކިސްތާން، ލީބިޔާ އަދި ބަންގްލަދޭޝްއާއި ގެމްބިއާ ހިމެނޭ ކަމަށެވެ.
ސައިޕްރަސް ދެ ބަޔަކަށް ބައިވެފައިވާ މައްސަލަ ހައްލު ކުރުމަށް އދން ކުރާ މަސައްކަތް އަދިވެސް ކާމިޔާބު ވެފައެއް ނުވެއެވެ. ޓާކިޝް ރިޕަބްލިކް އޮފް ސައިޕްރަސް އުފެދުނީ 1983ގައެވެ.
