ޕާކިސްތާންގެ ޕަންޖާބްގެ ގްރޭޑް 7ގެ ޓެކްސްޓް ފޮތުގައި މަލާލާ ޔުސުފްޒާއީގެ ފޮޓޯ ހުރެގެން އެފޮތްތައް ސަރަހައްދީ ސަރުކާރުން ހިފަހައްޓައިފިއެވެ. އޮކްސްފޯޑް ޔުނިވަރސިޓީ ޕްރެސްއިން ޗާޕްކޮށްފައިވާ މި ފޮތުގައި 1965ގެ ހަނގުރާމައިގެ ބަޠަލު މޭޖާ އަޒީޒު ބާޓީ ޝަހީދުގެ ފޮޓޯވެސް ޖަހާފައި ހުއްޓެވެ. މި ފޮޓޯތަކަކީ އެ ފޮތުގައި ހިމަނާފައިވާ މުހިންމު މީހުންގެ ވާހަތަކުގައި ޖަހާފައިވާ ފޮޓޯތަކެވެ. ހަމައެފަދައިން ޤާއިދޭ އަޢުޒަމްއާއި އައްލާމާ އިޤްބާލު އަދި ސަރ ސައްޔިދު އަޙްމަދު ޚާނާއި އަބްދުއްސައްތާރު އީދީގެ ފޮޓޯވެސް ޖަހާފައި ހުއްޓެވެ.
މިފޮތް ވަނީ އެކިއެކި ސްކޫލުތަކަށް ފޮނުވާފައެވެ.
ފުލުހުން ވަނީ ފޮތް ފިހާރަތަކާއި ސްކޫލުތަކަށް ރެއިޑްކޮށްގެން މި ފޮތް ހޯދަން މަސައްކަތް ކޮށްފައެވެ. މި ފޮތާ ދެކޮޅަށް ރިޕޯޓްކުރި ފަރާތުން ފުލުހުގައި ބުނެފައިވަނީ މި ފޮތުގައި މަލާލާއާއި ޔޫސުފް ބަޓީގެ ފޮޓޯ ޖަހާފައި ހުރި ކަމަށެވެ.
އޮސްފޯޑް ޕްރެސްއިން ބުނގޮތުގައި މި ފޮތް ޝާއިއުކޮށްފައި ވަނީ މި ފޮތާމެދު ކަމާ ބެހޭ ފަރާތުގެ އިޢްތިރާޒެއް ނެތްކަމަށް ބުނެ ލިޔުމުން ހުއްދަ ދިނުމުންނެވެ.
މިދިޔަ އަހަރުވެސް ޕާކިސްތާންގައި 100 ޓެކްސްޓް ފޮތް މަނާ ކުރެވުނެވެ. އެ ފޮތްތަކުގައި ބުނެފައި ވަނީ ސަބްކޮންޓިނެންޓް ދެ ގައުމުގެ މައްޗަށް ގައުމު ބަހާލުމަކީ ގާނޫނާ ޚިލާފް ކަމެއް ކަމަށެވެ. އަދި އެހެން ބައެއް ފޮތްތަކުގެ މައްސަލައަކީ، ޤާއިދޭ އަޢުޠަމްއާއި އައްލާމާ އިޤްބާލްގެ އުފަން ދުވަސް ނުބައިކޮށް ޝާއިއުކޮށްފައި އޮތުމެވެ. އިތުރު އެހެން ބައެއް ފޮތްތަކުގައި އިސްލާމްދީނާ ޚިލާފް ވާހަކަތަކެއް ހުރިކަމަށް ބުނެފައި ވެއެވެ.
މިފިޔަވަޅު އަޅާފައި ވަނީ ޕަންޖާބުން 2015ގައި ފާސްކޮށްފައިވާ ކަރިކިއުލަމްއާއި ޓެކްސްޓް ފޮތްތަކާ ބެހޭ ގާނޫނުގެ ދަށުންނެވެ.
