ޕާކިސްތާނަށް ފެން ލިބުން ދަތިވެފައިވާ ކަމަށް ޕާކިސްތާންގެ ނޭޝަނަލް ހެލްތު ސަރވިސްގެ ޕާލަމެންޓްރީ ސެކްރެޓެރީ ހާމަ ކުރައްވައެވެ. ޑރ. ނައުޝީން ޙާމިދު ވިދާޅުވަނީ، ޕާކިސްތާނަށް މީރު ފެން ލިބޭ މިންވަރު ވަނީ ކުރިއާ އަޅާ ބަލާއިރު 400 ޕަސެންޓަށް ދަށް ވެފައެވެ. 1947ގައި 5600 ކިއުބިކް މީޓަރު ފެން ލިބުނު އިރު މިހާރު ޕާކިސްތާނަށް ލިބެނީ 1038 ކިއުބިކް މީޓަރު ފެން ކަމަށެވެ. މި ކަމާ ބެހޭ ގޮތުން ބާއްވާފައިވާ ވެބިނާރުގައި އޭނާ ވިދާޅުވީ މިއީ ޕާކިސްތާނަށް ދިމާވެފައިވާ ސީރިއަސް މައްސަލައެއްކަމަށެވެ. ޕާކިސްތާނަކީ، ފަސްވަނަ އަށް ދުނިޔޭގައި އެންމެ ބައިބޯ ގައުމެވެ. އަދި ފެން ލިބުން ދަތިވުމުގެ ސަބަބުން 2025ހާ ހިސާބުގައި ޕާކިސްތާނަށް އިތުރު މައްސަލަތަކާ ކުރިމަތިވާނެ ކަމަށްވެސް އޭނާ ވިދާޅުވެއެވެ. އަދި މިއީ ޕާކިސްތާންގެ ކާނާގެ ސަލާމަތަށްވެސް އެއިން އަސަރުކުރާނެ ކަމެއްކަމުގައި އޭނާ ވިދާޅުވިއެވެ.
ޕާކިސްތާނަކީ ސާފު ބޯފެން ނުލިބޭ 10 ގައުމުގެ ތެރޭން އެއް ގައުމެވެ. ޕާކިސްތާންގައި ފެން ތަޣައްޔަރުވެފައި ވުމަކީވެސް މައްސަލައެކެވެ. މިކަމުގެ ސަބަބުން ޕާކިސްތާނުން ޕޯލިއޯ ނައްތާލުމަށް ކުރާ މަސައްކަތަށް ބޮޑެތި ގޮންޖެހުންތަކާ ކުރިމަތި ވެފައި ވެއެވެ. އަދި ބޭރަށް ހިންގުމުގެ ސަބަބުންވެސް ގިނަ ބަޔަކު ޕާކިސްތާންގައި ކޮންމެ އަހަރަކު މަރުވެއެވެ.
މި ވެބިނާރއަކީ، ބަޔަރ ޕާކިސްތާން ކުންފުނިން އިންތިޒާމު ކުރި ވެބިނާރެކެވެ. މި ވެބިނާރުގައި، މީހުންނަށް 40 ލީޓަރުގެ ތާނގީ ހަދިޔާ ކުރުމުގެ ރަސްމިއްޔާތެއް އޮތެވެ. މިއީ ފެން ލިބެން ހުންނަ ތަނުން ފެން ގެނައުމަށް ޓަކައި މީހުންނަށް ހަދިޔާކުރި ތާނގީތަކެކެވެ.
