އިންޑިއާއިން އޮގަސްޓް މަހު އދގެ ސަލާމަތީ މަޖިލީހުގެ ރިއާސަތު ބަލަހައްޓަން ފަށާއިރު، ކަނޑުދަތުރުފަތުރގެ ސަލާމަތާއި، އދގެ ސުލްޙަ ބަލަހައްޓާ ލަޝްކަރާއި، ޓެރަރިޒަމްއާ ދެކޮޅަށް ކުރާ މަސައްކަތާއި، އަފްޣާނިސްތާންގެ މައްސަލާގައި ބަހުސް ކުރާނެ ކަމުގައި އިންޑިއާއިން ބުނެއެވެ.
އިންޑިއާއިން ބުނާ ގޮތުގައި އަންނަ މަހު އިންޑިއާގެ ރިއާސަތުގައި، ދުނިޔޭގެ ފެންވަރުގައި ބޮޑެތި މައްސަލަތަކާ މެދު ބަހުސްކުރާއިރު، އިންޑިއާގެ ފަރާތުން މި ބަހުސްގައި ބައިވެރިވެ ވަޑައިގަންނަވާނީ، އިންޑިއާގެ ބޮޑު ވަޒީރު ނަރެންދްރަ މޮދީއާއި، އިންޑިއާގެ ޚާރިޖީ ވަޒީރު އެސް ޖަޔަޝަންކަރުއާއި ފޮރިން ސެކްރެޓަރީ ހަރްޝްވަރްދަން ޝްރިންގްލާއެވެ.
މޮދީ މި ބައްދަލުވުންތަކުގެ ރިއާސަތު ބަލަހައްޓަވާނީ މަޖާޒީ ކޮށެވެ. ޖަޔަޝަންކަރުއާއި ޝްރިންގްލާ ނިއުޔޯކަށް ވަޑައިގެންނެވެ. ފޮރިން ސެކްރެޓެރީ ޝްރިންގްލާ މިވަގުތު ހުންނެވީ ނިއުޔޯރކްގައެވެ.
އިންޑިއާއިން އދގެ ސަލާމަތީ މަޖިލީހުގެ ރިއާސަތަށް ހޮވާފައިވަނީ 2022އާ ހަމައަށް އޮންނަ ދެ އަހަރުގެ ދައުރަށެވެ.
ކުރިއަށް މިއޮތް ދުވަސްވަރު އިންޑިއާއިން މަތީފެންވަރުގެ މަޝްވަރާތަކެއް ފަރަންސޭސިވިލާތާއި އިނގިރޭސިވިލަތާއެކު ބާއްވާނެކަމަށްވެސް އިންޑިއާގެ އެކްސްޓާނަލް އެފެއާޒް މިނިސްޓްރީން ބުނެއެވެ. މި މަޝްވަރާތައް އޮންނާނީ ފަރަންސޭސި ޚާރިޖީ ވަޒީރު ނިއުޔޯކަށް ވަޑައިގަންނެވުމުން އޭނާގެ އަރިހުގައެވެ. އަދި އިނގިރޭސިވިލާތާއެކު އޮންނަ މަޝްވަރާތައް އެގައުމުގެ ޚާރިޖީ ވުޒާރާގެ ސްޓޭޓް މިނިސްޓަރ ނިއުޔޯކަށް ވަޑައިގަތުމުންނެވެ.
އިންޑިއާއިން ރާވާފައިވަނީ ދެ އަހަރުގެ ދައުރުގައި، އެގައުމުގެ ފޮރިން ސެކްރެޓަރީއާއި ޚާރިޖީ ވަޒީރު އެކި ދުވަސްވަރު ނިއުޔޯކްގައި ވަޑައިގެން ތިއްބަވާނެއެވެ.
