އަފްޣާނިސްތާންގެ ސަރަހައްދުތައް ތާލިބާނުން ހިފަމުންދާ މައްސަލައަކީ އަފްޣާނިސްތާންގެ އަޝްރަފް އަބްދުލްޣަނީގެ ސަރުކާރަށް ބޮޑުވެފައިވާ މައްސަލައެކެވެ. އަފްޣާނިސްތާންގައި އެމްބަސީ ގާއިމްކޮށްފައިވާ އެތައް ގައުމަކުން ވަނީ އެގައުމުތަކުގެ އެމްބަސީތަކާއި ކޮންސިއުލޭޓްތަކުން ސްޓާފުން މަދުކުރަންވެސް ފަށާފައެވެ.
އުތުރު އަފްޣާނިސްތާނާއި ކާބުލްގައި ފެތުރެމުންދާ ނުތަނަވަސްކަމާ ބެހޭ ގޮތުން އަފްޣާނިސްތާނުން ވަނީ އިންޑިއާއާއެކު މަޝްވަރާތައް ބާއްވާފައެވެ. އަފްޣާން ޚާރިޖީ ވަޒީރު މުޙައްމަދު ހަނީފު އަޓްމާރ ވަނީ އިންޑިއާގެ ޚާރިޖީ ވަޒީރާ މަޝްވަރާ ކުރައްވައި ހާލަތު ބަޔާންކޮށް ދެއްވާފައެވެ. މި ބައްދަލުވުން ބާއްވާފައި ވަނީ ޖަޔަޝަންކަރު ދެ ދުވަހުގެ ދަތުރުފުޅެއްގައި ތާޖިކިސްތާނަށް ވަޑައިގެން އުޅުއްވަނިކޮށެވެ. އޭނާގެ ދަތުރުފުޅަކީ، ޝެންހާއީ ކޯޕަރޭޝަން އޮރގަނައިޒޭޝަންގެ ގައުމުތަކާއެކު އޮންނަ ބައްދަލުވުމެކެވެ. މި ބައްދަލުވުމުގައި ސަރަހައްދުގެ ގައުމުތަކުގެ ފޮރިން މިނިސްޓަރުން ވަނީ އަފްޣާނިސްތާންގައި ނިއުޅެމުންދާ ސަލާމަތީ ހާލަތާ މެދު މަޝްވަރާ ކުރެއްވުމަށް ނިންމަވާފައެވެ.
އިންޑިއާއިން ވަނީ ކަންދަހާރުގައި ހުންނަ އިންޑިއާގެ ކޮންސިއުލޭޓުގެ 50 ޑިޕްލޮމެޓުން އަނބުރައި ގެނަސްފައެވެ. އިންޑިއާއިން ބުނެފައިވަނީ އަފްޣާނިސްތާންގެ ޙާލަތު ގާތުން ބަލަމުންދާ ކަމަށެވެ. އަދި ޑިޕްލޮމެޓުން ގެންދިޔަކަމުގައިވިއަސް، ކަންދަހާރްއާއި މަޒާރޭ ޝަރީފްގައި ހުންނަ ކޮންސިއުލޭޓްތައް ހުންނާނީ ހުޅުވާފައެވެ.
މިދިޔަ ހަފްތާތަކުގައި ތާލިބާނުން ވަނީ ފުޅާ ދާއިރާއެއްގައި ޓެރަރިސްޓް ހަމަލާތަކެއް ދީފައެވެ. އިންޑިއާއިން ވަނީ އަފްޣާނިސްތާންގައި އުމުރާނީ ތަރައްގީއަށް ތިން ބިލިއަން ޑޮލަރު އިންވެސްޓް ކޮށްފައެވެ.
ޝެންހާއީ ކޯޕަރޭޝަން އޮގަނައިޒޭޝަންއަކީ، އަށް މެމްބަރުން ހިމެނޭ ޖަމާއަތެކެވެ. އިންޑިއާއާއި ޕާކިސްތާންވެސް މިޖަމާއަތުގައި ހިމެނެއެވެ. އެހެން ގައުމުތަކަކީ، ރަޝިޔާއާއި ޗައިނާއާއި ކިރިގީޒިސްތާނާއި، ކަޒަޚިސްތާނާއި ތާޖިކިސްތާނާއި އުޒުބެކިސްތާނެވެ.
