ތާލިބާނާ ދެކޮޅަށް އިންޑިއާގެ އަސްކަރީ އެހީއަށް އަފްޣާނިސްތާނުން އެދޭނެ ކަމަށް އެގައުމުން ނިއުދިއްލީއަށް ކަނޑައަޅާފައިވާ އެމްބެސެޑަރ ވިދާޅުވެއެވެ. ނަމަވެސް ކާބުލްއިން މިފަދަ އެހީއަކަށް އެދޭނީ ތާލިބާނާއެކު ބާއްވާ މަޝްވަރާތައް ނާކާމިޔާބު ވެއްޖެ ހިނދެއްގައެވެ. ނިއުދިއްލީގައި ހުންނަވާ އަފްޣާން އެމްބެސެޑަރ ފަރީދް މާމޫންޒާއީ ވިދާޅުވީ، މި އެހީއަކީ ކާބުލްއަށް އިންޑިއާ ސިފައިން ފޮނުވުމަށް އެދޭނެ އެދުމެއް ނޫނެވެ. ނަމަވެސް މިއީ ސިފައިންގެ ތަމްރީނާއި ފަންނީ އެހީ ހޯދުމާ ބެހޭ ގޮތުން އެދޭނެ އެދުމެކެވެ.
އަފްޣާން ސަރުކާރާއި ތާލިބާނުން ދަނީ ބައްދަލު ވަމުންނެވެ. ނަމަވެސް ކުރި ލިބޭ ގޮތެއް ނުވެއެވެ. ތާލިބާނުން ދަނީ އަފްޣާން ބިންތައް ހިފަމުންނެވެ.
އިންޑިއާއިން އަފްޣާނިސްތާނަށް އަހަރަކު އެއްހާސް ސްކޯލަރޝިޕް ދެއެވެ. މިވަގުތުވެސް އިންޑިއާގައި އަފްޣާން 20 ހާސްކުދިން ކިޔަވަމުން ދެއެވެ. އިންޑިއާއިން ވަނީ އަފްޣާނިސްތާން ޕާލަމެންޓް އިމާރާތް އަޅައިދީފައެވެ. އަދި ޑޭމްތަކާއި ތަފާތު އުމްރާނީ ތަރައްގީގެ މަސައްކަތްތައްވެސް އިންޑިއާއިން އަފްޣާނިސްތާންގައި ހިންގާފައި ވެއެވެ.
އެމްބެސެޑަރު ވިދާޅުވިގޮތުގައި އަފްޣާނިސްތާން ސިފައިން ދަނީ ތާލިބާނާއެކު 376 ޑިސްޓްރިކްޓްގެ ތެރެއިން 150 ޑިސްޓްރިކްޓްގައި ހަނގުރާމަ ކުރަމުންނެވެ. އަދި އެޕްރީލް 2021ން ފެށިގެން ދެ ލައްކައެއްހައި މީހުން ވަނީ ބިކަވެފައެވެ. ހަތަރު ހާހެއްހައި މީހުން ވަނީ މަރުވެފައެވެ.
