ރޮއިޓަރޒްގެ ފޮޓޯގްރާފަރ ދާނިޝް ސިއްދީޤީ ޓެރަރިސްޓް ހަމަލައެއްގައި މިއަދު ނިޔާވެއްޖެއެވެ. ދާނިޝް ނިޔާވީ، އަފްޣާނިސްތާން ސިފައިންނާ އެކު ސްޕިންބޯލްޑާކް ސަރަހައްދުގައި އޭނާ ޙަރަކާތްތެރިވަނިކޮށް، ޓެރަރިސްޓް ޠާލިބާން ހަނގުރާމަ ވެރިން ދިން ޙަމަލައެއްގައެވެ. ޠާލިބާނުން ވަނީ އަފްޣާނިސްތާނާއި ޕާކިސްތާނާ ދެމދު އޮންނަ، ސަރަހައްދު ހުރަސްކުރާ ޕޮއިންޓް ސްޕިން ބޯލްޑާކާއި ޗަމަން ބޯޑާ ޕޯސްޓް އެމީހުންގެ އަތްދަށަށް ގެންގޮސްފައެވެ.
ދާނިޝްއަކީ ޕުލިޓްޒަރ ޕްރައިޒް ކާމިޔާބު ކޮށްފައިވާ ނޫސްވެރިއެކެވެ.
ދާނިޝް މަސައްކަތް ކުރަމުން ދިޔައީ މި ހިސާބުގަނޑުގެ ހަނގުރާމައިގެ ޙާލަތު ކަވަރު ކުރުމަށް ފޮޓޯ ނެގުމުގައެވެ. އޭނާ ގުޅިފައި ހުރީ އަފްޣާން ސިފައިންނާއެވެ.
ތާލިބާނުން ދީފައިވާ ހަމަލާގައި އޭނާއާއެކު އަފްޣާން ފައުޖުގެ އިސް ކޮމާންޑަރަކުވެސް ނިޔާވިއެވެ.
މި ހަމަލާގައި އޭނާ ނިޔާވުމުގެ ކުރިން އޭނާ ދަތުރުކުރި އުޅަނދަށް ތާލިބާނުން އަމާޒު ކުރި އެހެން ހަމަލައެއްގައި އިހައްދުވަހު އޭނާގެ އަތަށް ބޮޑެތި އަނިޔާތަކެއްވެސް ލިބިފައި ވިއެވެ.
ދާނިޝް ނިޔާވުމާ ގުޅިގެން ނޫސްވެރިންގެ ޖަމުޢިއްޔާތަކާއި ނޫސްވެރިން ދަނީ ހިތާމަ ފާޅު ކުރަމުންނެވެ.
އިންޑިއާގެ ކޮވިޑް19ގެ ހާލަތާއި ސިއްޙީ ފަރުވާގެ ދޯހަޅިކަން ދުނިޔެއަށް ހާމަވެގެން ދިޔައީ އޭނާ ނެގި ފޮޓޯތަކުގެ ސަބަބުންނެވެ. އޭނާއަށް ނިސްބަތް ކޮށް ބަދުބަސް ބުނަމުންދާ އިންޑިއާގެ ބައެއް މަޛްހަބީ ދެކޮޅުވެރިން ދަނީ ކޮވިޑްގައި މީހުން ބައިބަޔަށް އެންދުމާއި އެންދުމުގެ ދަތިކަމާ ބެހޭ ގޮތުން އޭނާ ނަގާފައިވާ ފޮޓޯތަކަށްވެސް ފާޑު ކިޔަމުންނެވެ. އެކަމަކު ޕްރޮފެޝަލް ނޫސްވެރިންގެ ފަރާތުން އޭނާގެ މަސައްކަތަށް އޮހެމުން ދަނީ ހައްގު ތަޢުރީފްގެ ބަސްތަކެވެ.
ދާނިޝްއަކީ، ލަންކާގައި ޓެރަރިސްޓުން އީސްޓަރގައި ފައްޅި ގޮއްވާލައި މީހުން މަރާލި ހާދިސާއަށްފަހު އެކަން ކަވަރު ކުރި ރޮއިޓަރޒްގެ ފޮޓޯ ޖަރނަލިސްޓެވެ.
އޭނާގެ މަސައްކަތަށް ސަމާލުކަމަށް ލިބިގެން ދިޔައީ، ބަރުމާގައި ސަރުކާރާއި ސިފައިން ވެގެން މުސްލިމުންގެ އާބާދީތައް އަންދާލައި އެމީހުން ބިކަކޮށްލި ހާދިސާގެ ފޮޓޯތައް ދުނިޔެއަށް އާންމު ކުރުމާ ގުޅިގެންވެ.
ދާނިޝްއަކީ އިންޑިއާގެ ޖާރުކަންދުގެ ރަށްވެއްސެކެވެ. އިންޑިއާގެ އެކްސްޓާނަލް އެފެއާޒް މިނިސްޓްރީން ބުނެފައި ވަނީ އަފްޣާނިސްތާނަގައި ހުންނަ އިންޑިއާގެ އެމްބެސެޑަރާ ގުޅިގެން ދާނިޝްގެ ޚަބަރުތައް ޢާއިލާއަށް އަންގަމުން ގެންދާ ކަމަށެވެ.
އެޑިޓަރުގެ ނޯޓެއް:
ދާނިޝްގެ ފޮޓޯގްރެފީއާ ބެހޭ ގޮތުން ޓުއިޓާގައި ލިޔެފައިވާ މި ސިލްސިލާ ޓުއީޓްތަކުން އޭނާގެ މަސައްކަތުގެ ހުނަރު ސާފުވެގެން ދާނެއެވެ. މިއީ މަލްޓިމީޑިއާގެ ނޫސްވެރިކަމުގެ ދާއިރާގައި މަސައްކަތް ކުރާ ފަރާތްތަކާއި ދަރިވަރުންނަށް މުހިންމު މަޢުލޫމާތު ހިމެނޭ ސިލްސިލާ ޓުއީޓްތަކެކެވެ.
