ތުރުކީވިލާތުން ބުނެފައި ވަނީ، ކާބުލްގެ އެއަރޕޯޓްގެ ސަލާމަތާއި ރައްކާތެރިކަން ބަލަހައްޓައި ދިނުމަށް ސިފައިން ބައިތިއްބަން ތުރުކީން ތައްޔާރަށް އޮތް ކަމަށެވެ. މިއާ ވިއްދައިގެން އިއްޔެ ތާލިބާނުން ބުނެފައި ވަނީ ތުރުކީވިލާތު ސިފައިން އަފްޣާނިސްތާނަށް ވަދެއްޖެނަމަ، އެމީހުން ބަލާނީ ތުރުކީ ސިފައިންނަކީ އަފްޣާނިސްތާނަށް ބޭރުން އަރާފައިވާ ބާރެއްގެ ގޮތުގައެވެ. ތުރުކީން ބުނަނީ އެމީހުންނަކީ ގަދަބާރުން އަރާނެ ބައެއް ނޫން ކަމަށެވެ. އަދި ތާލިބާނުން ދައްކާ ވާހަކައަކީ ރަމްޒީ ވާހަކައެއް ކަމަށެވެ.
ތުރުކީވިލާތަކީ ތާލިބާނަށް ތާއީދުކުރާ ގައުމެކެވެ. އަދި ތާލިބާންގެ އެތައް ބަޔަކު ތުރުކީގައި ދިރިއުޅެއެވެ. ތުރުކީން ނިންމާފައި ވަނީ ނޭޓޯގެ ސިފައިންގެ ތެރޭގައި ހިމެނޭ 500 އެއްހައި ތުރުކީ ސިފައިން ކާބުލްގެ އެއަރޕޯޓްގެ ރައްކަލަކަށް ބައިތިއްބާށެވެ.
އެމެރިކާއިންވެސް ވަނީ ބައިނަލްއަގްވާމީ ޖަމުއިއްޔާތަކާއި އެމްބަސީތައް ޙިމާޔަތް ކުރުމަށް އަފްޣާނިސްތާންގައި އެއްހާސް ސިފައިން ބައިތިއްބާ ގޮތަށް ނިންމާފައެވެ. އިނގިރޭސިވިލާތުންވެސް ވަނީ އެއް ސަތޭކަ ސިފައިން ބައިތިއްބާނެ ކަމަށް ބުނެފައެވެ.
ތާލިބާނުން ބުނެފައި ވަނީ ބައިނަލްއަގްވާމީ ޖަމުއިއްޔާތަކާއި އެމްބަސީތަކާއި ބޭރުގެ މީހުންނަށް އެމީހުންގެ ހަމަލަތައް އަމާޒު ނުވާނެ ކަމަށެވެ. ނަމަވެސް މި ޓެރަރިސްތް ޖަމާއަތަކީ ބަހުގެ އިތުބާރު ހިފޭ ބަޔެއް ނޫނެވެ.
