ސައޫދީ ޢަރަބިއްޔާގައި ވަރލްޑް ކަޕް ބޭއްވުމަށް އެގައުމުން ޝައުގުވެރިކަން ފާޅުކޮށްފިއެވެ. 2030ގެ ވަރލްޑް ކަޕް ބޭއްވުމަށް ސައޫދީ އަރަބިއްޔާއިން ބޭނުންވާ އިރު އިނގިރޭސިވިލާތާއި އަޔަރލެންޑް ގުޅިގެން ބޭއްވުމަށް އިނގިރޭސި ބޮޑު ވަޒީރު ބޮރިސް ޖޯންސަން ބޭނުންފުޅު ވެއެވެ.
އެހާތަނަށް ވަރލްޑް ކަޕް ބާއްވާއިރު އެ މުބާރާތް ވެގެންދާނީ، 48 ޓީމު ބައިވެރިވާ 80 މެޗް ކުޅޭ މުބާރާތަކަށެވެ. އެހެންވެ، އެންމެ ފުރިހަމައަށް މުބާރާތްތައް ބޭއްވޭނީ ދެ ގައުމަކުން ބައިވެރިވެގެނެވެ.
ރިޔާޟްއިން ވަރލްޑް ކަޕް ބާއްވަން ބޭނުންވަނީ އިތުރު އެހެން ގައުމަކާއެކުގައެވެ. މި ވަގުތު ސައުދީއާއެކު ބައިވެރިވާނެ ކަމަށް ކިޔަނީ އިޓަލީގެ ނަމެވެ. އިޓަލީއަކީ ސައޫދީއާއި ދެހާސް މޭލު ދުރުގައި އެހެން ބައްރެއްގައި އޮންނަ ގައުމެކެވެ.
ސައޫދީ އަރަބިއްޔާއިން މިކަމުގައި ކޮންސަލްޓެންސީ ހޯދަނީ ބޮސްޓަން ކޮންސަލްޓެންސީ ގްރޫޕުންނެވެ. އިޓަލީގެ އިތުރުން ސައޫދީން އެހެން ގައުމުތަކަކާ ބައިވެރިވެދާނެކަމަށްވެސް އަދި ލިސްޓް ކުރެވިފައި ވެއެވެ. އެގޮތުން މެދު އިރުމައްޗާއި އުތުރު އެފްރިކާ ހިމެނޭ ގޮތަށް މޮރޮކޯއާއި މިސްރު ބައިވެރިކޮށްގެން ބެއްވުމަކީވެސް ސައޫދީން ވިސްނާނެ އެއް ގޮތެވެ. ސައުދީއާއެކު، މި ދެ ގައުމުން ވަރލްޑް ކަޕް ބާއްވާނަމަ، އުމުރާނީ ތަރައްގީ ކުރުމަށް އިތުރު މަސައްކަތްތަކެއް މިދެ ގައުމުން ކުރަން ޖެހޭނެއެވެ.
ސައޫދީ އަރަބިއްޔާއަށް ވަރލްޑް ކަޕް ބޭއްވުމަށް ދިމާވާނެ ހުރަހެއް ކަމަށް ލަފާ ކުރެވެނީ އެގައުމުގެ އިންސާނީ ޙައްގުގެ ހާލަތެކެވެ.
