ޗައިނާގެ ލީޑަރުގެ ސިޔާސީ ވިސްނުން މިއަހަރުން ފެށިގެން ޗައިނާގެ ހުރިހައި ތަޢުލީމީ ހަރުފަތެއްގައި ކިޔަވައިދޭން ފަށާނެ ކަމަށް އެގައުމުގެ އެޑިއުކޭޝަން މިނިސްޓްރީން އަންގައިފިއެވެ. ޗައިނާގެ ރައީސް ޝީ ޖިންގޕިންގެ ސިޔާސީ ފިކުރަކީ، ޗައިނާގެ ހުރިހައި ކަމެއްވެސް ސީނުކަރަ ވަންތަކަން އަށަގެންނެވުމަށް ބާރުއަޅާ ވިކސްނުމެކެވެ. ޗައިނާގެ ރައީސްގެ އިރުޝާދުތަކުގެ މައްޗަށް ބިނާކޮށް ކޮމިއުނިސްޓް ޕާޓީއާއި ސަރުކާރުގެ ޕްރޮޕެގެންޑާ ތައްޔާރު ކުރާ ފަރާތްތަކުން ވަނީ އޭނާގެ ފިކުރަށް ފަލްސަފާއެއް އެކުލަވާލައި، އެ ފަލްސަފާގެ މައްޗަށް ފޮތްތައް ލިޔެ ޝާއިއުކޮށްފައެވެ.
މިނިސްޓްރީ އޮފް އެޑިއުކޭޝަނުން ބުނެފައި ވަނީ، މިއަހަރުގެ ޚަރީފް މޫސުމުން ފެށިގެން އިބްތިދާއީ ތަޢުލީމާއި ސާނަވީ ތަޢުލީމުގެ ހަރުފަތްތަކާއި ޔުނިވަރސިޓީ ތަޢުލީމުގައި ޝީ ޖިންގ ޕިންގގެ ސިޔާސީ ވިސްނުން ކިޔަވައިދޭން ފަށާނެ ކަމަށެވެ. މިއީ، ރައީސް ޝީގެ ސިޔާސީ ވިސްނުމަކީ، ސީނުވަންތަ ސިފައާއެކު، ރައްޔިތުންގެ މެދުގައި ހަމަހަމަކަން ގާއިމުކުރުމަށް ގޮވާލާ ސިޔާސީ ފަލްސަފާ އެކެވެ. މި ފަލްލސަފާގެ މައްޗަށް އެކި މަރުޙަލާއަށް ދަރިވަރުން މުތާލިޢާ ކުރުމަށް ފޮތްބައިތައް އެކުލަވާލައިފައި ވެއެވެ.
މިފޮތް ބައި އެކުލަވާލާފައިވަނީ، ޗައިނާގެ މިނިސްޓްރީ އޮފް އެޑިއުކޭޝަންގެ ދަށުން ހިންގާ "ޝީ ޖިންޕިންގ ރިސާޗް ސެންޓަރ ފޯ ސޯޝަލިޒަމް ވިތު ޗައިނީޒް ކަރެކްޓެރިސްޓިސް އިންސްޓިއުޓު"ންނެވެ.
އެޑިއުކޭޝަން މިނިސްޓްރީގެ ވެބްސައިޓްގައި ބުނެފައި ވަނީ މި ފޮތް ބައި ފަސް ޕްރޮވިނސެއްގެ 30 ސްކޫލެއްގައި އަޖުމަ ބެލުމަށް ތަޖުރިބާ ކުރެވިފައިވާ ކަމަށެވެ. އަދި ތަފާތު ފަރާތްތަކުގެ ޚިޔާލު ހޯދައި 200 ޓީޗަރުންވެސް މިކަމުގައި ބައިވެރިކޮށްފައި ވާނެ ކަމަށެވެ.
ކުރިއަށް އޮތް ދުވަސްތަކުގައި ޓީޗަރުންނާއި ޓެކްސްޓް ފޮތްތައް ލިޔާ މީހުންނ ތަމްރީނު ކުރުމަށް މަސައްކަތް ކުރެވޭނެ ކަމަށްވެސް ބުނެފައި ވެއެވެ.
ޗައިނާގެ އެހެން ޓެކްސްޓް ފޮތްތަކާ ޚިލާފަށް މި ފޮތަކީ ކުދިން ފޫނި ނުވާނެ ގޮތަކަށް އެކުލަވާލާފައިވާ ފޮތްބައެއް ކަމަށްވެސް އެޑިއުކޭޝަނުން ޔަގީންކަން ދެއެވެ.
ޝީއަށް ޗައިނާގެ މީޑިއާއާއި ތަޢުލީމީ ނިޒާމާއި އެކަޑެމިކް ދިރާސާތަކުގައި ޚާއްސަ އަހަންމިއްޔަތެއް ދެވިފައި ވެއެވެ. ގައުމުގެ އެންމެ ބޮޑު ސިކުނޑީގެ ގޮތުގައި އެމަނިކުފާނުގެ ފިކުރާ ބެހޭ ގޮތުން ބައެލޮޖީއާއި ފިޒިކްސްގެ ދާއިރާގައިވެސް ބަހުސް ކުރެވެއެވެ. ޗައިނާގެ އެކި ހިސާބުހިސާބުގައި ޝީގެ ސިޔާސީ ފިކުރާ މެދު ދިރާސާތައް ތައްޔާރު ކުރާ 18 ޝީ ޖިންގ ޕިންގ މަރުކަޒުތައް ހިންގަމުން ގެންދެއެވެ.
ޝީގެ ޝަޚުޞިއްޔަތު ކުރިއަށް ނެރުމަށްޓަކައި މިހާރުގެ ޗައިނާއިން ކުރަމުންދާ މަސައްކަތަކީ ރަނގަޅަށް ވިލަރެސް ކުރެވިގެން، ޗެއަރމަން މާއޯގެ ޕްރޮޕެގެންޑާ މަސައްކަތަށް ވުރެން ރަނގަޅަށް ކުރިއަށް ގެންދެވޭ މަސައްކަތެކެވެ. އަދި އުތުރު ކޮރެއާގެ ލީޑަރު ޕްރޮމޯޓް ކުރުމަށް ކުރެވޭ މަސައްކަތަށް ވުރެންވެސް މާހަރުދަނާ ފެންވަރެއްގައި ރައީސް ޝީ ޕްރޮމޯޓް ކުރުމަށް ޗައިނާގައި މަސައްކަތް ކުރަމުން ގެންދެއެވެ.
