ޗައިނާގެ އިންޓަރނެޓް ބަލަހައްޓާ އިދާރާގެ ކުރީގެ ވެރިޔާގެ ތަހުގީގީ ބަޔާންތައް ޗައިނާ ކޮމިއުނިސްޓް ޕާޓީން އާންމު ކޮށް ދައްކާލުމަށް ޕާޓީގެ މައުރަޒުގައި ބަހައްޓައިފިއެވެ. ކޮމިއުނިސްޓް ޕާޓީގެ މައުރަޒަކީ، އެޕާޓީއަށް 100 އަހަރު ފުރުން ފާހަގަ ކުރުމުގެ ގޮތުން އަލަށް ހުޅުވި މައުރަޒެކެވެ.
ލު ވެއި، އަކީ ޗައިނާގެ ސައިބަރސްޕޭސް އެޑްމިނިސްޓްރޭޝަންގެ އެންމެ ފުރަތަ މަސްއޫލުވެރިޔާއެވެ. އޭނާއަށް ވަނީ ކޮރަޕްޝަންގެ ތުހުމަތުގައި ޙުކުމް ކޮށްފައެވެ.
ކޮމިއުނިސްޓް ޕާޓީގެ މިއުޒިއަމްގައި ބަހައްޓާފައިވާ އޭނާގެ ބަޔާންގައި ވަނީ އޭނާގެ އިޙުސާސްތަކާއި، އޭނާގެ ތަހުގީގު ހިނގަމުން ދިޔައ ދުވަސްވަރު އޭނާގެ އުފަން ދުވަސް ފާހަގަ ކުރުމަށް އޭނާއަށް ކޭކެއް ހަދިޔާ ކުރެވުނު ވާހަކައެވެ. ކޮއިމުނިސްޓް ޕާޓީން ދައްކައި ދޭން ބޭނުންވެފައި ވަނީ ރައީސް ޝީ ޖިންޕިންގގެ އެންޓި ކޮރަޕްޝަން މަސައްކަތުގައި ސަރުކާރުން އަމަލުކުރާ ގޮތް ދެއްކުމަށެވެ.
ލު ވެއި އަކީ، ފޭސްބުކް ގެ ބާނީ މާކް ޒުކަބަރގް، ޗައިނާ ރައީސް ޝީއަށް ތަޢާރަފް ކޮށްދެއްވި ފަރާތެވެ. އަދި ކުރިން އޭނާއަކީ މާކް ޒުކަބަރގްފަދަ މުހިންމު މީހުންނާއެކު ބައްދަލު ކޮށް އުޅުނު މީހެކެވެ.
ޝީގެ ވެރިކަމުގައި ޗައިނާގެ 400އެއްހައި މަސްއޫލުވެރިން ވަނީ ކޮރަޕްޝަންގެ މައްސަލަތަކުގައި ޖަލަށް ލާފައެވެ. ބައެއް މީހުންނަށް މަރުގެ ޙުކުމް އިއްވައި ދަންޖައްސާފައި ވެސް ވެއެވެ.
ލު ވެއި އަކީ އާދައިގެ އާއިލާއަކުން އައިސް ކޮމިއުނިސްޓް ޕާޓީގެ އެންމެ މަތީ ފަޑިއަށް އެރި މީހެކެވެ. އޭނާ ބުނެފައިވާ ގޮތުގައި އޭނާގެ މަންމައަކީ ލިޔަންކިޔަން ނުދަންނަ މީހެކެވެ.
އުމުރުން 61ގެ ލު އަށް އިއްވާފައި ވަނީ 14 އަހަރުގެ ޖަލު ޙުކުމެކެވެ.
