ރަޝިޔާއާއި ޗައިނާއިން ފަޒާގައި އެމެރިކާގެ ސެޓެލައިޓްތަކަށް ދީފާނެ ހަމަލައަކުން ސަލާމަތް ވުމަށް އިނގިރޭސިވިލާތުގައި އެމެރިކާއިން ޖައްވީ ކަންކަމަށް ޖާސޫސް ކުރާ މަރުކަޒެއް ބިނާކުރުމަށް ނިންމައިފިއެވެ. އިނގިރޭސިވިލާތުގައި ބިނާ ކުރާ މަރުކަޒުގެ އިތުރުން އެމެރިކާގެ ޓެކްސަސްއާއި އޮސްޓްރޭލިއާގައިވެސް މިފަދަ މަރުކަޒުތައް އެމެރިކާއިން ބިނާ ކުރާނެއެވެ.
އެމެރިކާއިން މަސައްކަތް ކުރާ މި ދިފާއީ ނިޒާމަށް ދީފައިވާ ނަމަކީ، ޑީޕް ސްޕޭސް އެޑްވާންސް ރޭޑާ ކޭޕަބިލިޓީ އެވެ. މިނިޒާމު ބޭނުންކޮށްގެން ފުޓް ބޯޅައަކާ އެއްވަރުގެ ތަކެތި ދުނިޔޭގެ ޖައްވުގައި އުޅޭނަމަ، 22 ހާސް މޭލު ދުރުން އެތަކެތި ހޯދައި ގަންނާނެއެވެ. އެމެރިކާއިން ބުނާ ގޮތުން މި ނިޒާމު ތައްޔާރުކޮށް 2027ގައި ނިމި، މައްސަކަތަށް ފައްކާ ކުރެވޭނެއެވެ. މި ނިޒާމުގެ މަސައްކަތް ފެށުމާއެކު ސެޓެލައިޓަށް އަންނަ ނުރައްކާތެރި ހަމަލަތަކާއި ދުނިޔޭގެ ޖައްވުގައި އުޅޭ ސެޓެލައިޓުން އުފެދޭ ކުނިބުނިވެސް ހޯދައި ދަނެގަނެވޭނެއެވެ.
އެމެރިކާގެ މަސްއޫލުވެރިއަކު ވިދާޅުވިގޮތުގައި މި ނިޒާމުގައި ބޭނުންކުރާނީ މާސިންގާ 16 ބޯތަށްޓެވެ. މިއިން ޖައްވުގައި އަތްފުނާ އަޅައި އަބަދުވެސް ފާރަވެރިވާނެއެވެ. މިއިން ކޮންމެ ބޯތަށްޓެއްގެ ވަށަމިނުގައި 50 ފޫޓު ހުންނާނެއެވެ. އަދި މިއިން ކޮންމެ ބޯތަށްޓަކުން، 150 ފުޓުބޯޅަ ދަނޑުވަރުގެ ޖައްވީ ސަރަހައްދެއްގައި އަތްފުނާ އަޅައި ހަދާނެއެވެ.
ޗައިނާއާއި ރަޝިޔާއިން އެމެރިކާގެ ސެޓެލައިޓްތަކަށް ނުރައްކާ ކޮށްފާނެ ކަމުގެ ވާހަކަ އެމެރިކާގެ ދިފާއީ ފަރާތްތަކުން ވަނީ މިފަހަކަށް އައިސް ވަރަށް ގިނައިން ދައްކާފައެވެ. އަދި މިއަހަރަށް ބަޖެޓް ހެދުމަށް ލަފާ ކުރުމުގައިވެސް މީގެ ނުރައްކަލާ މެދު ވާހަކަ ދައްކާފައި ވެއެވެ.
އެމެރިކާގެ މިނިޒާމަކީ، ކުރިމަތިވެދާނެ ބެލެސްޓިކް މިސައިލަކަށް އިންޒާރު ދިނުމަށްވެސް އެކަށީގެންވާ ނިޒާމެއް ކަމުގައި އެމެރިކާ މަސްއޫލުވެރިން ވިދާޅުވެއެވެ.
