ޔަހޫދީ ސޮފްޓްވެއަރއެއް ބޭނުންކޮށްގެން ސަރުކާރުތަކުން އެމީހުންގެ ރައްޔިތުންނަށް ޖާސޫސް ކުރިކަމުގެ ވާހަކައެއް ބޭޒާރުވެއްޖެއެވެ. އިޒްރޭލުގެ އެންއެސްއޯ ކުންފުނިން ބުނެފައި ވަނީ އެކުންފުނީގެ ޕެގަސަސް ސޮފްޓްވެއަރއަކީ އިތުބާރު ކުރެވޭ ސަރުކާރުތަކަށް ވިއްކާ ސޮފްޓްވެއަރއެއް ކަމަށެވެ. އެންއެސްއޯ ކޮންޓްރޯލް ކުރަނީ އިޒްރޭލުގެ ދިފާއީ ވަޒީރެވެ.
މިސޮފްޓްވެއަރ ބޭނުންކޮށްގެން ޖާސޫސްކޮށްފައި ވަނީ އިންސާނީ ހައްގަށް މަސައްކަތް ކުރާ ފަރާތްތަކަށާއި، ނޫސްވެރިންނާއި ލޯޔަރުންނާއި ގާޒީންނާއި މަސްއޫލުވެރިންނަށެވެ.
ޕެގަސަސް ބޭނުންކޮށްގެން ޖާސޫސްކޮށްފައި ވަނީ އަމާޒު ކުރެވުނު ފަރާތްތަކުގެ ފޯނުގައި ހިމެނޭ ޑޭޓާއާއި ފޯނު ބޭނުންކޮށްގެން ކޮށްފައިވާ މުއާމަލާތްތަކަށާއި ދައްކާފައިވާ ވާހަކަތަކަށެވެ. ޕެރިހުގެ ފޮރބިޑެން ސްޓޯރީއާއި އެމްނެސްޓީ އިންޓަރނޭޝަނަލްއާއި ބައިނަލްއަގްވާމީ 16 މީޑިއާއެއް ގުޅިގެން މިމައްސަލައިގެ ތަހްގީގެއް ހިންގާފައި ވެއެވެ.
ޕެގަސަސް ބޭނުންކޮށްގެން، އައިފޯނާއި އެންޑްރޮއިޑްގައި ވަގު ސޮފްޓްވެއަރއެއް އިންދާލެވެއެވެ. މި ސޮފްޓްވެއަރ ބޭނުންކޮށްގެން މެސެޖްތަކާއި ފޮޓޯތަކާއި އީމެއިލާއި ފޯންކޯލްތައް ސިއްރުން ބަލާލެވެއެވެ. އަދި ފޯނު އަޑު އެހެއެވެ.
އިޒްރޭލު ކުންފުނިން ބުނަނީ ތިމަން މެންގެ މި ޔަހޫދީ ސޮފްޓްވެއަރ ވިއްކަނީ ޓެރަރިސްޓް އަމަލުތަކަށް ޖާސޫސް ކުރުމަށް ސަރުކާރުތަކަށް އެކަނި ކަމަށެވެ.
މިހާތަނަށް ހޯދިފައިވާ ހޯދުންތަކުން ދައްކަނީ، ޕެގަސަސް މެދުވެރިކޮށް ޖާސޫސްކޮށްފައިވާ ބައި ލައްކައެއްހައި މީހުން އުޅޭ ކަމަށެވެ.
މި ސޮފްޓްވެއަރ ބޭނުންކޮށްފައިވާ ގައުމުތަކުގެ ތެރޭން އެއްގައުމެއްގެ ވެރިމީހާ އޭނާގެ ގާތް އާއިލާގެ މެންބަރުންނަށް މި ސޮފްޓްވެއަރ ބޭނުންކޮށްގެން ޖާސުސްކުރިކަމަށް ހޯދުންތަކުން ދައްކައެވެ. އެހެން ބައެއް ގައުމުތަކުގައި ވިޔަފާރިވެރިންނާއި ރައީސުންނާއި ބޮޑުވަޒީރުންނާއި ވަޒީރުންނަށްވެސް ޖާސޫސްކޮށްފައިވާ ކަން ދައްކައެވެ. އިންޑިއާގައި ވަޒީރުންނަށް ޖާސޫސްކޮށްފައިވެއެވެ.
އާދީއްތަ ދުވަހުން ފެށިގެން ނިއުޅެމުންދާ މި ތަހުގީގުގައި ބުނަމުން ދަނީ، 180 ނޫސްވެރިއަކަށް ޖާސޫސްކޮށްފައިވާ ކަމަށެވެ. އޭގެ ތެރޭގައި ސީއެންއެންއާއި ރޮއެޓަރޒްފަދަ ބޮޑެތި އެޖެންސީތަކުގެ ނޫސްވެރިން ހިމެނެއެވެ.
ޔަހޫދީ ސޮފްޓްވެއަރ ބޭނުންކޮށްގެން ޖާސޫސްކުރި ގައުމުތަކުގެ ތެރޭގައި ދެކުނު އޭޝިއާއިން އިންޑިއާ ހިމެނެއެވެ. ޔޫރަޕުން ހަންގެރީ ހިމެނެއެވެ. އަދި އެމެރިކާ ސަރަހައްދުން މެކްސިކޯ ހިމެނެއެވެ. އެފްރިކާއިން ރުވަންޑާ ހިމެނެއެވެ. އަދި އިސްލާމީ ގައުމުތަކުގެ ތެރޭން، ގަލްފްގެ ޔޫއޭއީ އަދި ބަޙުރައިން ހިމެނެއެވެ. އުތުރު އެފްރިކާއިން މަޣުރިބް ހިމެނެއެވެ. އަދި މެދުތެރޭ އޭޝިއާއިން އަޒަރްބައިޖާނާއި ކަޒަޚިސްތާން ހިމެނެއެވެ.
