ޔޫރަޕްގެ 16 ގައުމަކުން ކޮވިޝީލްޑް، އެސްޓްރާޒެނެކާ ބަލައިގަންނަ ކަމަށް ބުނެފިއެވެ. މި ވާހަކަ މީޑިއާއަށް ހާމަ ކުރައްވާފައި ވަނީ ސެރަމް އިންސްޓިއުޓް އޮފް އިންޑިއާގެ ސީއީއޯ، އާދާރް ޕޫނޭވާލާއެވެ.
އޭނާ ވިދާޅުވި ގޮތުގައި މިގޮތަށް ހަމަޖެހިގެން ދިޔަނަމަވެސް އެންމެ ރަނގަޅު ގޮތަކީ ޔޫރަޕަށް ދަތުރުފެށުމުގެ ކުރިން ޔަގީންކޮށް ވެކްސިންއާ މެދު ދަތުރަށް ފުރާ ގައުމެއްގައި ގެންގުޅޭ ސިޔާސަތު އަމިއްލައަށް ބެލުމެވެ.
ޔޫރަޕްގެ ޖަމާއަތުން ވެކްސިން ޕާސްޕޯޓް އެކުލަވާލި އިރު އިންޑިއާގެ ކޮވިޝީލްޑް އޭގައި ހިމެނުމަށް އެދިފައި ނުވާތީ ލިސްޓްކޮށްފައެއް ނުވެއެވެ. ނަމަވެސް އިންޑިއާގެ ޚާރިޖީ ވުޒާރާއިން އެދިގެން ފަހުން ވަކިވަކި ގައުމުތަކުން ވަނީ ކޮވިޝީލްޑް ބަލައިގަންނަ ކަމަށް ނިންމައި އެކަން އިޢުލާން ކޮށްފައެވެ.
ޔޫރަޕްގެ ގައުމުތަކުގެ ތެރޭން ކޮވޮޝީލްޑް ބަލައި ގަންނަ ކަމަށް ބުނެފައިވާ ގައުމުތަކަކީ އޮސްޓްރިއާއާއި، ބެލްޖިމްއާއި، ބަލްގޭރިއާއާއި، ފިންލެންޑާއި، ޖަރމަނީއާއި، ގްރީސްއާއި، ހަންގެރީއާއި، އައިސްލެންޑާއި، އަޔަރލެންޑާއި، ލެޓްވިއާއާއި، ނެދަރލެންޑްސްއާއި، ސްލޮވީނިއާއާއި، ސްޕެއިންއާއި ސުއިޑެންއާއި، ސްވިޒަރލެންޑާއި، ފްރްނާސެވެ. އެންމެ ފަހުން މިކަން އިޢުލާން ކުރި ގައުމަކީ ފްރާންސެވެ.
