އިސްލާމްއާބާދުގައި އަފްޣާނިސްތާންގެ އެމްބެސެޑަރުގެ އަންހެން ދަރިފުޅާ ބަޔަކު މީހުން ބެހުމުގެ ސަބަބުން، އިސްލާމްބާދުގައި ހުންނަ އަފްޣާން އެމްބެސެޑަރާއި އެމްބަސީގެ ހުރިހައި ޑިޕްލޮމޭޓުން ވަގުތުން، އަނބުރައި ކާބުލްއަށް ވަޑައިގަތުމަށް ރައީސް އަޝްރަފް އަބްދުލްޣަނީ އިއްޔެ އަމުރު ކުރައްވައިފިއެވެ.
ޕާކިސްތާނުން ވަނީ އަފްޣާނިސްތާންގެ ރައީސްގެ ނިންމެވުމަށް ފާޑު ކިޔާފައެވެ.
އަފްޣާނިސްތާނުން ބުނެފައި ވަނީ އަފްޣާން ޑިޕްލޮމޭޓުންނަށް ޕާކިސްތާންގައި ސަލާމަތާއި ރައްކާތެރިކަން ކަށަވަރުކޮށް ނުދެވޭނަމަ، އިސްލާމްއާބާދަށް ކާބުލްއިން ޑިޕްލޮމޭޓުން ނުފޮނުވާނެ ކަމަށެވެ. ޕާކިސްތާނުން ބުނިގޮތުގައި ރައީސް ޣަނީގެ ނިންމެވުމަކީ ހިތާމަވެރި ނިންމެވުމެކެވެ.
ޕާކިސްތާންގެ ހޯމް މިނިސްޓަރ ވިދާޅުވެފައި ވަނީ މި މައްސަލަ މިހާރު ބަލަމުން ގެންދާ ކަމަށެވެ. އަދި ދާދި އަވަހަށް މި ތަހުގީގު ނިމިގެން ދާނެ ކަމަށެވެ.
އަފްޣާނިސްތާންގެ ކުރީގެ ރައީސް ޙަމީދު ކަރްޒާއީވެސް ވަނީ ބަޔަކު މީހުން މަގުމަތިން ސިލްސިލާއާ ބެހުނު މައްސަލަ ކުށްވެރި ކުރައްވާފައެވެ.
