ޗައިނާގައި 2022 ގައި ބޭއްވުމަށް ހަމަޖެހިފައިވާ ފިނިމޫސުމުގެ އޮލިމްޕިކްސްގައި ޗައިނާގެ އިންސާނީ ހައްގުތަކުގެ ވާހަކައަށް ބިނާކޮށް، ގައުމުތަކުން ބައިވެރި ނުވާން ބާރުއަޅަމުންދާ ބަޔަކު ވަނީ ދުނިޔެއިން ޗައިނާގެ އިންސާނީ ހައްގުތަކުގެ ރެކޯޑަށް ސަމާލުކަން ދިނުމަށް ގޮވާލާފައެވެ. މިމީހުން ބުނަނީ ޓިބެޓާއި ޝިންޖިއާންއާއި މޮންގޯލިއާ ދަރިކޮޅުގެ މީހުންނަށް ޗައިނާއިން ތަފާތު ކުރާކަމަކީ ސީރިއަސްކޮށް ނަގަން ޖެހޭނެ މައްސަލައެކެވެ.
ދުނިޔޭގެ ގައުމުތަކަށް މިކަމަށް ގޮވާލާ މީހުންނަކީ ހޮންގކޮންގއާއި ޖަޕާނާއި ޗައިނާގައި އިންސާނީ ހައްގުގެ މައްސަލަތަކުގައި ހަރަކާތްތެރިވާ ބައެކެވެ.
މިމީހުން ވަނީ އެމީހުންގެ މިގޮވާލުމާއި ހަރަކާތްތެރިވުމަށް ދުނިޔޭގެ ސަމާލުކަން ހޯދުމަށް ޓޯކިޔޯގައި ހުންނަ ޗައިނާ އެމްބަސީގެ ބޭރުގައި އެއް ގަޑިއިރުވަންދެން މުޒާހަރާއެއްވެސް ބާއްވާފައެވެ.
ޗައިނާގައި އޮންނަ އޮލިމްޕިކްސް ބޭއްވުމާ މި ދޭތެރޭގައި އޮތީ 200 ދުވަހެވެ. މިމީހުން ސިފަ ކުރާ ގޮތުގައި މިއީ ޖެނޮސައިޑްއޮލިމްޕިކްސް އެކެވެ. މި ނަމުން މިމީހުން ވަނީ ހޭޝްޓެގެއް ހަދައިގެން މީސްމީޑިއާގައި އިޝްތިހާރުކޮށްފައެވެ.
ޓޯކިޔޯގައި މުޒާހަރާ ކުރި މީހުން ވަނީ ޗައިނާ އެމްބަސީއަށް އެމީހުންގެ އިހުތިޖާޖުގެ ލިޔުމެއްވެސް ޙަވާލުކޮށްފައެވެ.
