ޗައިނާއިން މައިކްރޯޗިޕް އުފެއްދުމަށް ކުރަމުންދާ މަސައްކަތަށް އަނެއްކާވެސް ހިޔަނި އެޅިއްޖެއެވެ. 2015ގައި ވުޖޫދަށް އައި ޓިންގުއާ ޔުނިގްރޫޕްއިން މަސައްކަތް ފެށީ ޗައިނާއިން އަމިއްލަ ކޮމްޕިއުޓަރ ޗިޕް އުފައްދައި އެމެރިކާއަށް ބަރޯސާވުން ކުޑަ ކުރުމުގެ ބޭނުމުގައެވެ. މި ކުންފުނިން މަސައްކަތް ފެށުމުން ސަރުކާރުން ކުންފުންޏަށް ތަނަވަސް ގޮތަކަށް މާލީ އެހީތެރިކަން ދިނެވެ. އެސާހިތަކުން ފެނިގެން ދިޔައީ، އެމެރިކާގެ ކޮމްޕިއުޓަރ ޗިފް އުފައްދާ މައިކްރޮން، 23 ބިލިއަން ޑޮލަރަށް، ގަތުމަށް ޓިންގުއާ ޔުނިގްރޫޕުން ހުށަހެޅިތަނެވެ.
މިއަދު ނިއުޔޯކް ޓައިމްސްއިން ރިޕޯޓްކޮށްފައި ވަނީ ވުޖޫދަށް އައިތާ ހަ އަހަރު ފަހުން މިހާރު ޓިންގުއާ ޔުނިގްރޫޕް އިފްލާސްކުރުމަށް އެދި އެކުންފުންޏަށް ދަރަނި ދީފައިވާ ފަރާތަކުން ކޯޓަށް މައްސަލަ ހުށަހަޅާފައިވާ ކަމަށެވެ.
ކުރިން ޓިންގުއާ ކުންފުނި ނަމޫނާއަކަށް ދެއްކުނީ، ސަރުކާރުން މަގު ދައްކައިގެން ކެޕިޓަލިޒަމް ހިނގައިފިނަމަ ނިކުންނާނެ ކާމިޔާބު ނަތީޖާއާ ފޮނިވާނެ ކަމަށް ބުނެއެވެ. ނަމަވެސް މިހާރު ފެނިގެން ދަނީ މިއީ އަސްލު ފެންނަ ވަރަށް ވުރެން ބޮޑަށް ބޮޑު ކުރެވުނު ކުންފުނިތަކެއް ކަމަށެވެ.
ޗައިނާގެ ސަރުކާރު މީޑިއާގެ ތަފާސްހިސާބު ދައްކާގޮތުން 2020ގެ ޖެނުއަރީން އޮކްޓޯބަރު މަހާހަމައަށް ޗައިނާގައި ސެމީކޮންޑަކްޓަރ އުފައްދުމަށް 58ހާސް ކުންފުނި އުފައްދާފައި ވެއެވެ. އެއީ ދުވާލެއްގެ މައްޗަށް 200 ކުންފުނީގެ މަގުންނެވެ.
ޗައިނާއިން މަސައްކަތް ކުރަމުން ދަނީ ކޮމްޕިއުޓަރ ޗިޕްގެ ދާއިރާގައި އެމެރިކާއަށް ބަރޯސާ ނުކޮށް، އަމިއްލައަށް ޗިޕް އުފެއްދުމުގެ މަސައްކަތުގައި އުޅުމަށެވެ.
ޓިންހުއާއަށް އެމެރިކާގެ މައިކްރޯން ނުގަނެވުނީ ފައިސާ ނެތިގެނެއް ނޫނެވެ. ނަމަވެސް އެމެރިކާ ސަރުކާރުގެ ސަމާލުކަމަށް މިކަން އައިސްގެން އެމެރިކާ ސަރުކާރުގެ އެންމެ މަތީފެންވަރުގައި މިކަމާ ދެކޮޅަށް މަސައްކަތް ކުރުމުންނެވެ. އެއަށްފަހު އެމެރިކާގެ ޙައްސާސް ޓެކްނޮލޮޖީ ޗައިނާގެ އަތް ދަށު ނުވެވޭތޯ ބެލުމަށް ގިނަ ފިޔަވަޅުތަކެއް އަޅާފައި ވެއެވެ.
