އިންޑިއާގެ އޯލާ އިލެކްޓްރިކް އިން އުފައްދާފައިވާ ބެޓެރިން ދުއްވާ ސައިކަލް، ގިނަ ދުވަހުގެ އިންތިޒާކަރަށް ފަހު ބާޒާރަށް ނެރެން ނިންމައިފިއެވެ. އޯލާ އިލެކްޓްރިކްއިން ބުނެފައި ވަނީ އެކުންފުނީގެ އައު ބެޓެރިން ދުއްވާ ސައިކަލްގެ އަގު އުޅޭނީ، ދިވެހި ފައިސާގެ 30ހާސް ރުފިޔާއަށް ވުރެން ހެޔޮކޮށެވެ. އެއީ، އެވަރެޖްކޮށް އިންޑިއާގެ ބާޒާރުގައި ސައިކަލެއް ގަނެގެން ރަޖިސްޓްރީކޮށް ފީދައްކައި އިންޝުއަރކޮށް ދުއްވަން ފަށާއިރު ޖެހޭ ވަރުގެ އަދަދެކެވެ.
އިންޑިއާއަކީ ކޮންމެ އަހަރަކު 21 މިލިއަން އައު ސައިކަލް މަގުތަކަށް ނެރެ ދޭ ބާޒާރެކެވެ. މިއިން 6.5 މިލިއަން ސައިކަލްއަކީ ކުދި، ސްކޫޓަރ ކެޓަގަރީގެ ސައިކަލެވެ،.
އޯލާއިން ބުނާ ގޮތުގައި އެކުންފުނިން އަގު ހަދާފައިވަނީ އާންމުކޮށް ބާޒާރުގައި ސައިކަލްގެ އަގު ހުންނަ މިންވަރުގައި ބަހައްޓައިގެން މީހުންނަށް ބެޓެރިން ދުއްވާ ސައިކަލް ގަތުމަށް ހިތްވަރު ދިނުމުގެ ބޭނުމުގައެވެ.
އޯލާ އިލެކްޓްރިކްއިން އައު ބެޓެރި ސައިކަލް ގަތުމަށް މިމަހުގެ 15ގައި ރަޖިސްޓްރީވުމަށް ހުޅުވާލުމާއެކު، ފުރަތަމަ 24 ގަޑިއިރުގެ ތެރޭގައި އެއް ލައްކަ މީހުން ވަނީ ސައިކަލު ގަތުމަށް ރަޖިސްޓްރީ ވެފައެވެ.
އޯލާއިން ބުނާ ގޮތުގައި އެކުންފުނީގެ ސައިކަލަކީ، އޭގެ ދުވެލީގެ ބާރުމިނާއި، މަޑިދަށުގައި ހުންނަ ޖާގައިގެ ނިސްބަތުންނާއި، ބެޓެރި ޗާޖްކޮށްގެން ދުއްވޭ ކިލޯމީޓަރުގެ ނިސްބަތުންނާއި ޓެކްނޮލޮޖީގެ ނިސްބަތުން ބާޒާރުގައި އެވަރުގެ ދެވަނައެއް ނެތް ވަރުގެ ސައިކަލެއް ކަމަށެވެ.
ޓެމިލްނާޑޫގައި ހުންނަ އޯލާ ފެކްޓްރީން އަހަރަކު އޯލާގެ ސައިކަލުގެ ދިހަ މިލިއަން ސައިކަލް ބާޒާރަށް ނެރުމަށް ހަމަޖެހިފައި ވެއެވެ. އޯލާވެ ވެރިޔާ ބަހަވޭޝް އަގަރުވާލް ބުނާ ގޮތުން މިއީ ދުނިޔެއަށް ނެރޭ އިންޑިއާގެ އުފެއްދުމެކެވެ. އަގަރުވާލް އަކީ އިންޑިއާގައި ދުއްވާ ކުލީ ކާރު ކުންފުނި އޯލާގެ ވެރިޔާއެވެ.
