އިސްލާމްއާބާދު އިންޓަރނޭޝަނަލް އެއަރޕޯޓްގެ ސީލިންގުން ބައެއް ވެއްޓިއްޖެއެވެ. ޕާކިސްތާންގެ ޑޯން ނޫހުން ރިޕޯޓް ކުރިގޮތުގައި މި ހާދިސާ ދިމާވެފައި ވަނީ މިހާރު އިސްލާމްއާބާދަށް ބޯކޮށް ވެހެމުންދާ ވާރޭގެ ސަބަބުންނެވެ. ސީލިންގ ފަޅާލައިގެން، ފެން ފޭބުމުގެ ސަބަބުން އަގު ބޮޑު ކޮމްޕިއުޓަރާއި ކައުންޓަރުތަކުގައި ބޭނުންކުރާ ޓާމިނަލްތަކާއި ސާމާނުތަކަށްވެސް ބޮޑެތި ގެއްލުންތައް ލިބިފައި ވެއެވެ. އަދި އެނޫހުން ބުނިގޮތިގައި ސީލިންގގެ ބައެއް ވެއްޓިފައިވަނީ މިކަން ބަލަން ސިވިލްއެވިއޭޝަންގެ ސްޓާފުން ހަރަކާތްތެރި ވަނިކޮށެވެ. މި ހާދިސާ މެދުވެރިވިއަސް، އެއަރޕޯޓްގެ މަސައްކަތަށް ހުއްޓުމެއް އައިސްފައެއް ނުވެއެވެ.
ޕާކިސްތާން ސަރުކާރުން 105 ބިލިއަން ރުޕީސް ހޭދަކޮށްގެން ހެދި މިއެއަރޕޯޓްގެ މަސައްކަތް ކޮށްފައި ވަނީ ޗައިނާ ސްޓޭޓް ކޮންސްޓްރަކްޝަން އިންޖިނިއަރިންގ ކޯޕަރޭޝަން (CSCEC) އިންނެވެ.
އަހަރަކު 15 މިލިއަން ޕަސިންޖަރުންނަށް ޚިދުމަތް ދެވޭ މި އެއަރޕޯޓްގެ އޮޕަރޭޝަން ފެށުނީ 2018 މެއި މަހުގައެވެ. އެއަރޕޯޓް ބިނާ ކުރުމުގެ މަސައްކަތް ފެށުނީ 2007 އެޕްރީލްގައެވެ.
މި އެއަރޕޯޓްގެ މަސައްކަތް ފެށިތާ ހަތް މަސް ނުވަނީސް މައްސަލަތައް ދިމާވާން ފެށިއެވެ. އެތައް ފަހަރެއްގެ މަތިން ސީލިންގ ބޮލަށް ވެއްޓިފައި ވެއެވެ. އަދި ނަރުދަނާތައް ބެދިގެން ވަސް ނުބައި ވުމާއި ފެންބޮޑުވުމުގެ މައްސަލަތައް ދިމާވެގެން މަސައްކަތް ހުއްޓެން މެދުވެރިވެފައި ވެއެވެ.
އިސްލާމްއާބާދު އެއަރޕޯޓްގެ ސީލިންގ ވެއްޓުމުގެ ހާދިސާއެއް އެންމެ ފަހުން ދިމާވެފައި ވަނީ މިދިޔަ އޮގަސްޓް މަހުގެ ތެރޭގައެވެ. އެ ހާދިސާއަށްފަހު ސިވިލް އެވިއޭޝަނުން ވަނީ މައްސަލަ ތަހުގީގުކޮށްފައެވެ. މިފަހަރުވެސް ސީލިންގ ވެއްޓުނު މައްސަލަ ތަހުގީގު ކުރުމަށް ވަނީ ނިންމާފައެވެ.
2019 ވަނަ އަހަރު ކަސްޓަމްސް އޭރިއާ ފަޅައިގެން ދިއުމުގެ ސަބަބުން އެބައިވެސް އެހެން ތަނަކަށް ބަދަލު ކުރަން ޖެހުނު ކަމަށް ޑޯން ނޫހުން ބުނެފައި ވެއެވެ.
