ޕާކިސްތާންގައި އަޟްޙާ އީދާ ދިމާކޮށް، މީހުން ވީއްލިގެން އުޅުމުގެ ސަބަބުން ޑެލްޓާ ވޭރިއެންޓު ފެތުރެމުން ދިއުމުން މިހާރު، ސިންދު ޕްރޮވިންސްގައި ކޮވިޑްގެ ހާލަތު ހައްދުން ނެއްޓިއްޖެއެވެ. ކަރާޗީގައި ހަސްފަތާލުތައް ފުރިގެން ދިއުމާ ގުޅިގެން މީހުން އެނދުމަތި ނުކޮށް، އަނބުރާ ފޮނުވާލުން ވަނީ އާންމު ކަމަކަށްވެފައެވެ.
ސިންދު ޕްރޮވިންސްގައި ކޮވިޑްގެ ހާލަތުގެ ސީރިއަސްކަން ސަރުކާރުން ވަނީ މީހުންގެ ސަމާލުކަމަށް ގެނަސްފައެވެ. ނަމަވެސް މީހުން ވަނީ އެންގުންތައް ބޮލާލައި ޖަހައި ބަސްނައަހާ އުޅެފައެވެ.
މިދިޔަ 24 ގަޑިއިރު ތެރޭގައި ސިންދުގެ ކޮވިޑްގެ ހާލަތު އޮތީ ކުރިއާ އަޅާބަލާއިރު 25 އިންސައްތައަށް އިތުރުވެ ގޯސްވެފައެވެ. ކޮވިޑަށް ފައްސިވާ ނިސްބަތް އުޅެނީ ގައުމުގެ އެހެން ސަރަހައްދުތަކާ އަޅާ ބަލާއިރު 5 އިންސައްތައަށް ވުރެން އިތުރު ވުމެއްގައެވެ.
ޕާކިސްތާން މެޑިކަލް އެސޯސިއޭޝަނުން ބުނެފައި ވަނީ މީހުންނާ އަޅާ ނުލެވޭ ވަރަށް ސިއްޙީ ނިޒާމު ބޮއްސުންލުމަކާ ގާތަށް ގޮސްފައިވާ ކަމަށެވެ.
ކަރާޗީ ޔުނިވަރސިޓީގެ ސެންޓަރ ފޯރ ކެމިކަލް އެންޑް ބައެލޮޖިކަލް ސައިންސަސްއިން ބުނާ ގޮތުގައި ޑެލްޓާ ވޭރިއެންޓް ވަނީ 92.2 އިންސައްތައަށް ކަރާޗީގައި ވަކި ހިއްޕާފައެވެ.
