ޗައިނާގެ މީސްމީޑިއާގައި ވަރަށް ހަރަކާތްތެރިކަމާއެކު އުޅުމަށްފަހު ގެއްލުނު އުއިގުރު ޕްރޮފެސަރު ފުލުހުންގެ ބަންދުގައި ހުރިކަން އޭނާ މަސައްކަތް ކުރި ޔުނިވަރސިޓީން ޔަގީން ކޮށްދިނެވެ. މިހާރު އޭނާ މަރުވެފައިވާ ކަން ވަނީ ކަށަވަރުވެފައި ކަމަށް ރޭޑިއޯ ފްރީއޭޝިއާއިން ބުނެއެވެ.
އެމެރިކާގެ ޔޯމިންގ ޔުނިވަރސިޓީން ޕީއެޗްޑީ ހަދައިގެން އެމެރިކާގައި އުޅުމަށްފަހު ޝެންހާއިގެ ޔުނިވަރސިޓީގައި ކިޔަވައިދިން ތުރުސަންޖަން ނޫރުމާމަދް (ނޫރު މުޙައްމަދު) އެންމެފަހުން މީސްމީޑިއާގައި ޙިއްސާކޮށްފައި ވަނީ އަންހެނުންގެ ދުވަހު އޭނާގެ މަންމައާއި އަންހެން ދަރިފުޅުގެ ފޮޓޯއެވެ. އޭނާއަކީ ރިސަރޗް ސައިންޓިސްޓެކެވެ.
އޭނާ ކިޔަވައިދޭން އުޅުނު ޓޮންޖީ ޔުނިވަރސިޓީން އޭނާ ފުލުހުންގެ ބަންދުގައި ހުރިކަން ކަށަވަރު ކޮށްދިނެވެ. ޔުނިވަރސިޓީން ބުނީ، އޭނާއާ ބެހޭ އިތުރު މަޢުލޫމާތެއް ފުލުހުން ނުދިން ކަމަށެވެ. މި ޔުނިވަރސިޓީގައި 2018 އން ފެށިގެން އޭނާ ކިޔަވައި ދެއެވެ.
ޝިންޖިއާންގެ ވެރިރަށް ކަޝްގަރުގެ ކައިރި ހިސާބެއްގައި އޮންނަ ޔަރްކަންދްގެ އުފަން މި ޕްރޮފެސަރއަކީ ކިޔަވައިގެން ތިބި ޙަރަކާތްތެރި، އުއިގޫރު މުސްލިމުންނާ ދެކޮޅަށް ޗައިނާއިން ހިންގާ ސިލްސިލާގައި މަރުވި އެންމެ ފަހު މީހާއެވެ.
އެމެރިކާއާއި އދއާއި އިންސާނީ ހައްގުތަކަށް މަސައްކަތް ކުރާ ފަރާތްތަކުން ބުނާ ގޮތުގައި ޗައިނާއިން މިލިއަނެއްހައި އުއިގުރު މުސްލިމުން ހުރަގޭގައި ބަންދުކޮށްގެން ގެންގުޅެއެވެ.
އުއިގޫރު ދަރިކޮޅުގެ އިސްމީހުންނާ ދޭތެރޭ ޗައިނާއިން ހަރުކަށި ފިޔަވަޅު އެޅުން 2016ން ފެށިގެން ވަނީ އިތުރު ވެފައެވެ.
