ޖަޕާނުގެ ކޮންމެ ދުވަހަކީ ޗައިނާއާއެކު ހަނގުރާމައެއްގައި އުޅޭ ދުވަހެއްކަމުގައި އޮސްޓްރޭލިއާއަށް ކަނޑައަޅާފައިވާ އެމްބެސެޑަރ ވިދާޅުވެއެވެ. އެމްބެސެޑަރ ޝިންގޯ ޔަމާގަމީ ވިދާޅުވީ، އޭނާ މަގާމާ ޙަވާލުވެވަޑައިގަތް ފަހުން މީހުން އޭނާއާއެކު ވާހަކަ ދައްކާއިރު ޗައިނާއާއެކު ޖަޕާނުން ބާއްވާ ގުޅުމުގެ ފުރިހަމަކަމަށް އިޝާރާތް ކުރާ ކަމަށެވެ. ނަމަވެސް މިއީ މީހުންނަށް ހީވެފައިވާ ކުށް ހީއެއް ކަމަށް ވިދާޅުވަމުން އެމްބެސެޑަރ ވިދާޅުވީ ޖަޕާނަށް ކޮންމެ ދުވަހަކީވެސް ޗައިނާއާއެކު ހަނގުރާމައިގައި އުޅޭ ދުވަހެއް ކަމަށެވެ. އަދި އޮސްޓްރޭލިއާއާއި ޗައިނާގެ ގުޅުމަށް އިޝާރާތް ކުރައްވަމުން އޭނާ ވިދާޅުވީ، ޖަޕާނުންވެސް އުޅެނީ އޮސްޓްރޭލިއާއާ އެއް އޮޑިއެއްގައި ކަމަށެވެ.
އޮސްޓްރޭލިއާއިން ކޮވިޑް19ގެ ހަގީގަތް ހޯދުމަށް ގޮވާލާ ގައުމުތަކާ ބައިވެރިވުމުން ޗައިނާއިން ވަނީ އޮސްޓްރޭލިއާއާ ދެކޮޅަށް ވިޔަފާރީގެ ދަތިކުރުންތަކެއް ކުރިމަތިކޮށް ދުއްތުރާ ކޮށްފައެވެ.
ޓައިވާނަށް ވެކްސިން ނުލިބިގެން އުޅުމުން، އެކަމުގައި ޖަޕާނުން އެހީވުމުން ޗައިނާއިން ވަނީ ރުޅިގަދަވެގެން ނިއުކްލިއަރ ހަމަލައެއްދީ، ޖަޕާން ސުންނާފަތިކޮށްލާނެ ކަމުގެ އިންޒާރު ދީފައެވެ.
ޖަޕާނުން ބުނާ ގޮތުގައި ޗައިނާ ބާރުގަދަ ވެގެން ދިއުމުން ޗައިނާ ވަނީ ހިސާބުގަނޑު މީހުންނަށް ބޮޑު ބޮލު ރިހުމަކަށް ވެފައެވެ.
