ޗާއިނާއިން ބުނެފައިވަނީ ޗައިނާގެ ރައްޔިތުން ބޮމުގެ ހަމަލައެއްގައި މަރާލި ހާދިސާއަށް ރައްދު ފިޔަވަޅު އަޅާނެ ކަމަށެވެ. މި ހާދިސާއަށް އެއްވެސް ފަރާތަކުން ޒިންމާ އުފުލާފައެއް ނުވެއެވެ. ޕާކިސްތާންގެ ހޯމް މިނިސްޓްރީން ބުނެފައި ވަނީ ބަސް ކޯރަށް ވެއްޓުނީ ގޮވައިގެން ކަމަށެވެ. އަދި ފުރަތަމަ ތަހުގީގުތަކުން ބަހުން ގޮވާ މާއްދާގެ އަސަރު ފެނިފައި ވާ ކަމަށެވެ.
ސައުތު ޗައިނާ މޯނިންގ ޕޯސްޓުން މިއަދު ޗައިނާ މުޙައްލިލުންނާ ޙަވާލާ ދީ ބުނެފައި ވަނީ ޗައިނާ މީހުން ދަތުރުކުރި ބަސް ގޮއްވާލީ ތާލިބާނުން ކަމަށެވެ.
ޚައިބަރު ޕަޚްތޫންޚުވާ ޕްރޮވިންސްގައި މި ބަސް ގޮއްވާލުމުން ޖުމުލަ 13 މީހުން މަރުވިއެވެ. މިއިން ނުވަ މީހަކީ ޗައިނާ މީހުންނެވެ. ދެމީހަކީ މިމީހުންގެ ފާރަވެރިންގެ ގޮތުގައި އުޅުނު ސިފައިންގެ ދެމީހުންނެވެ.
ބެއިޖިންގ ގެ ކޮންޓެމްޕަރަރީ އިންޓަރނޭޝަނަލް ރިލޭޝަންސް ޗައިނާ އިންސްޓިއުޓްގެ ޕްރޮފެސަރ ލީ ވެއި ބުނާ ގޮތުން ޚައިބަރު ޕަޚްތޫންޚުވާ ސަރަހައްދަކީ ޕާކިސްތާންގައި ޙަރަކާތްތެރިވާ ތާލިބާން ޖަމާއަތުގެ ހަނގުރާމަވެރިން ހެލިފެލިވެ އުޅޭ ސަރަހއްދެކެވެ.
ޗައިނާއިން ސިފަކޮށްފައިވަނީ މިއީ ޓެރަރިސްޓް ހަމަލައެއްގެ ގޮތުގައެވެ. އަދި ޗައިނާގެ ޕަބްލިކް ސެކިއުރިޓީ މިނިސްޓަރ ވަނީ ޕާކިސްތާންގެ ދާޚިލީ ވަޒީރު ޝެއިޚް ރަޝީދު އަޙުމަދަށް ގުޅުއްވައިގެން ޗައިނާ މީހުންގެ ސަލާމަތީ ކަންކަން ވަރުގަދަ ކޮށްދިނުމަށް އެދިވަޑައިގެންފައެވެ.
