މިއަހަރުގެ އީދުގައި ޕާކިސްތާންގެ ސިންދުގެ އަވަށެއްގައި ފުލުހުން ބައިތިއްބައިގެން ހަމަނުޖެހުން ކޮންޓްރޯލު ކުރަން ސަރުކާރަށް މަޖުބުރުވީ، ހިސާބުގެ ވަލީވެރިޔާގެ ޒިޔާރަތަށް ބަޔަކު މީހުން ހައްޖަށްދާން އުޅުމުން އެކަން މައްސަލައަކަށް ވެގެން ނެވެ.
ކަރާޗީއާއި ކައިރީގައި އޮންނަ ބާދިން އަވަށުގައި ހުންނަ ޒިޔާރަތަކީ ޕާކިސްތާން މީހުންގެ ނަޒަރުގައި ނަދުރު ފުދޭ ޒިޔާރަތެކެވެ. މި ޒިޔާރަތުގެ ވެރިކަމާ ހެދި ދެ ޖަމާއަތަކުން ކޯޅެން ފެށުމުން މީގެ 35 އަހަރު ކުރިން ވަލީވެރިޔާގެ ޒިޔާރަތް ވަނީ ބަންދުކޮށްފައެވެ.
އޭގެ ފަހުން، އަނެއްކާވެސް މިއަހަރުގެ ހައްޖު ދުވަހާ ދިމާކޮށް ބަޔަކު މީހުން މިޒިޔާރަތަށް ހައްޖަށް ދާން އުޅުމުން އެމީހުންނާ ދެކޮޅަށް ވާދަވެރި ޖަމާއަތުން ހަތިޔާރާއެކު ނުކުތުމުން ސަރުކާރުން ކާފިއު އިއުލާންކޮށް ހިސާބުގަނޑު ބަންދުކުރީއެވެ.
މިއަވަށަށް ކިޔަނީ ލުއާރީ ޝަރީފްއެވެ. އަދި މި ވަލީވެރިޔާ ޕާކިސްތާންގައި މަޝްހޫރުވެފައި ވަނީ ވަލީވެރިންގެ ރަސްގެފާނު، ސުލްޠާނުލްއައުލިޔާ ގެ ނަމުންނެވެ. މިކަލޭގެފާނުގެ އަސްލު ނަންފުޅަކީ، ހަޒްރަތު ޚަވާޖާ މުޙައްމަދު ޒަމާން އެވެ.
މީހުން ބުނާ ގޮތުން 1950އާއި 1960ގެ އަހަރުތަކުގައިވެސް މީހުން ޙައްޖު ދުވަހު މިކަލޭގެފާނުގެ ޒިޔާރަތަށް ގޮސް ހައްޖުކޮށް އުޅުނެވެ! ވަﷲ އަޢުލަމު.
